मोहोळ : मोहोळच्या राजकारणाला व नेत्यांना मी गेल्या 35 वर्षांत शिस्त लाऊ शकलो नाही. ते काम आमदार रमेश कदम यांनी केवळ पाच महिन्यांत केले. तो असल्याशिवाय पुन्हा तालुक्याला शिस्त लागणार नाही. रोडच्या पलीकडचे सगळंच ओरबडून घेतले. त्यात माझा काय दोष नव्हता. मात्र, प्रकाश चवरे नावाच्या कारखान्यातील हंगामी कामगाराने मला प्रपंच करा, असे सांगितले .मात्र, ते सोलापुरवाशी झाल्याने त्यांनी आपले पेनुरातील घर आहे का, पडले ते आधी पाहावे. मगच दुसऱ्याला ज्ञान शिकवावे, असे प्रतिपादन माजी मंत्री तथा भाजपचे नेते लक्ष्मणराव ढोबळे यांनी केले.

मोहोळ तालुक्यातील गोटेवाडी येथील नव्याने निवडून आलेल्या सरपंच, उपसरपंच व सदस्याचा सत्कार सोहळ्याचे त्यावेळी ढोबळे बोलत होते. यावेळी अर्थ व बांधकाम सभापती विजयराज डोंगरे, जि. प. सदस्य तानाजी खताळ, समता गावडे, संतोष वाकसे, यशवंत नरुटे, सुरेश शिवपुजे, रामचंद्र खांडेकर, मोहन होनमाने, अज्ञान होनमाने, सरपंच श्रीदेवी हांडे, उपसरपंच त्रिंबक जाधव यांच्यासह गावकरी उपस्थित होते.

राष्ट्रवादीचा समाचार घेताना ढोबळे पुढे म्हणाले, बांधलेली पेंडी विस्कटायची व राजकारण करावयाचे असा तालुक्यातील नेत्यांचा धंदा आहे. तो हाणून पाडा, फक्त पेंडी विस्कटू देऊ नका. बैलसुद्धा काकरी धरून चालतो. मात्र, तालुक्याचे राजकारण काकरी सोडून चालले आहे. ते पाहा व बंद करा. दोन्ही निवडणुकात उमेदवार होण्यापेक्षा माणस निवडून आणण्याचे काम मला करावयाचे आहे. कामाचा बैल आणावयाचा त्याच्याकडून काम करून द्यावयाचे व त्याला साेडून द्यावयाचे अशी कामाची स्टाईल आहे. कोणावरही उपकार नाहीत, दुधावरची साय, दही, तूप अगोदरच काढून घेतले आहे. उपकार असतील तर फक्त ताकाचेच असले पाप नेत्यांनी केले.

सभापती डोंगरे म्हणाले, भविष्यात विकासाच्या अनुषंगाने गोटेवाडीकडे चांगले लक्ष राहील. जि. प. सदस्य तानाजी खताळ यांनी या भागाचा चांगला विकास केला झाले. शाळा खोल्या व ग्रामपंचायत इमारत हे मुख्य दोन प्रश्न या गावांचे आहेत. ते प्राधान्याने सोडवू, पूर्वी नेत्यांचे फोटो टाकून कार्यकर्त्यांना जाहिराती द्याव्या लागायच्या. मात्र, आता कार्यकत्त्याचे फोटो टाकून नेत्यावर जाहिराती देण्याची वाईट वेळ आली आहे. यावेळी मोहोन होनमाने यांनी आभार मानले.