निपाणी : कोरोना, महापूर, अतिवृष्टीमुळे तब्बल दोन वर्षे बंद असलेल्या येथील आगारातून लांब पल्यासह ग्रामीण भागात विविध ठिकाणी बससेवा सुरु झाल्या आहेत. मात्र पुरेशा बसअभावी विद्यार्थ्यांना जीव धोक्यात घालून लोंबकळत प्रवास करावा लागत आहे. महामार्गावरूनही अनेक विद्यार्थी बसमधून लोंबकळत बसप्रवास करत आहेत. त्यामुळे त्यांच्या जीवाला धोका निर्माण झाला आहे. कोरोनामुळे दोन वर्षापासून विविध शाळा, महाविद्यालयांचा आनॅलाईन अभ्यासक्रम व परीक्षाही आॅनलाईनच झाल्या आहेत.

त्यामुळे यंदा विविध परीक्षा व महाविद्यालयातून उतीर्ण होणारया विद्यार्थ्यांची संख्या चौपट झाली आहे. प्रवेश क्षमतेपेक्षा जास्त विद्यार्थी उतीर्ण झाल्यामुळे अनेक हायस्कूल, महाविद्यालयांना जादा वर्ग सुरु करावे लागले आहेत. त्यामुळे शिक्षकांची कसरत सुरु झाली आहे. निपाणी आगारातून विद्यार्थ्यांना सवलतीच्या दरात बसप्रवास करता येऊन सुलभ शिक्षण घेण्यासाठी बसपासची योजना राबविली आहे. त्याचा लाभ ग्रामीण भागातील विद्यार्थ्यांना झाला आहे. बससेवा सुरळीत सुरु असली तरी विद्यार्थ्यांना बसमध्ये जागा मिळत नसल्याने तारेवरची कसरत करावी लागत आहे.

यंदा विद्यार्थी संख्या चौपट

कोरोनामुळे आॅनलाईन शिक्षणासह परीक्षाही आॅनलाईन झाल्या आहेत. त्यामुळे सर्वच विद्यार्थी उतीर्ण झाले आहेत. यंदा उतीर्ण होणारया विद्यार्थ्यांची संख्या प्रतिवर्षापेक्षा चौपट झाल्यामुळे बसमध्ये विद्यार्थ्यांना जागा मिळविण्यासाठी कसरत करावी लागत आहे. तर काही विद्यार्थिनींना दुसरया बसच्या प्रतिक्षेत थांबावे लागत आहे. त्यामुळे शाळा, महाविद्यालयात वेळेत पोहचणे कठीण झाले आहे.

`यंदा विद्यार्थ्यांची संख्या जास्त असल्यामुळे विद्यार्थिनींची गैरसोय होत आहे. त्यांना बसमध्ये जागा मिळत नसल्याने पर्यायी दुसरया बसच्या प्रतिक्षेत थांबावे लागत आहे. त्यामुळे शाळा, महाविद्यालयात वेळेत पोहचता येणे अशक्य झाले आहे.`

-शरद पाटील,

पालक, यमगर्णी

`शाळा, महाविद्यालये सुरु होताच ग्रामीण भागातील सर्वच मार्गावर बससेवा सुरु केल्या आहेत. मात्र यंदा विद्यार्थी संख्या जास्त असल्यामुळे एकाच बसमधून सर्व विद्यार्थी शाळा, महाविद्यालयात पोहचू शकत नाहीत. त्यांना पर्यायी दुसरया बसने प्रवास करणे भाग पडत आहे.`

-मंजुनाथ हडपद,

आगार व्यवस्थापक, निपाणी