पुनवत : सैन्यदलात कार्यरत शिराळा तालुक्यातील बिऊर-विश्रामबाग येथील तेजस युवराज मोरे (वय २४) हे कर्तव्य बजावत असताना अचानक चक्कर येऊन पडले. नंतर त्यांना (Jawan Tejas More) तातडीने रुग्णालयात दाखल करण्यात आले. मात्र, रविवारी (ता. १४) उपचार सुरू असताना त्यांचे निधन झाले. त्यांच्या पार्थिवावर काल सकाळी दहाच्या सुमारास शासकीय इतमामात सकाळी अंत्यसंस्कार करण्यात आले.

त्यांच्या पार्थिवास वडील युवराज मोरे, भाऊ तुषार मोरे यांनी भडाग्नी दिला. बिऊर गाव व परिसरात शोककळा पसरली होती. आज त्याचा पार्थिव घरी आणल्यानंतर आई अनिता, वडील युवराज व भाऊ तुषार यांचा आक्रोश मन हेलावणारा होता. तेजस यांचा मृत्यू नेमका कशामुळे झाला, याचे कारण स्पष्ट झाले नसून व्हिसेरा राखून ठेवण्यात आल्याची माहिती पार्थिवासमवेत आलेल्या जवानांनी दिली.

वडील युवराज यांनी दोन्हीही मुलांना सैन्यात भरती करायच्या जिद्दीने काबाडकष्ट करून शिकवले. परिस्थितीची जाणीव ठेवून तुषार व तेजस हे भाऊ एकाच दिवशी, २० जून २०१८ रोजी सैन्यदलात भरती झाले. तेजस राजस्थानमधील लालगड येथे टेन्मेंट इन्फंट्री युनिटमध्ये मॅकनाईज विभागात शिपाई पदावर कार्यरत होते. तेजस यांना कर्तव्य बजावतानाच रविवारी अचानक चक्कर आली. अन्य जवानांनी त्याला तातडीने सेना रुग्णालयात नेले. तेथून गंगानागर येथील सेना रुग्णालयात हलवण्यात आले.

मात्र, प्रकृती अधिक बिघडल्याने तातडीने हेलिकॉप्टरने चंदीगड (Chandigarh) येथील सेना रुग्णालयात नेण्यात आले. मात्र, उपचारांदरम्यान त्यांचा मृत्यू झाला. तेजस यांचे भाऊ तुषार मोरे हे हिमाचल प्रदेशमध्ये कार्यरत आहेत. ते सुटीवर बिऊर येथे आले आहेत. तेजस यांचे पार्थिव अमोल मोरे, आकाश बामनळे हे जवान गावी घेऊन आले. नायब तहसीलदार हसन मुलाणी, पोलिस निरीक्षक सिद्धेश्वर जंगम यांनी पार्थिवावार पुष्पचक्र अर्पण केले.

राष्ट्रवादी युवक काँग्रेसचे जिल्हाध्यक्ष विराज नाईक, माजी जिल्हा परिषद सदस्य रणधीर नाईक, मंडल अधिकारी सविता पाटील, जिल्हा सहकार बोर्डचे माजी अध्यक्ष सुखदेव पाटील, ‘विश्वास’चे संचालक दिनकरराव पाटील, तलाठी राहुल काळे, पोलिस पाटील सीताराम पाटील, सरपंच स्वाती पाटील, उपसरपंच श्रीरंग पाटील, कोतवाल उत्तम पाटील आदींसह माजी सैनिक व ग्रामस्थ संख्येने उपस्थित होते. तेजसच्या मागे आई, वडील, एक भाऊ असा परिवार आहे.