इचलकरंजी : भाजपशी युती (BJP-JDS Alliance) करण्याचा निर्णय मान्य न झाल्यामुळे महाराष्ट्र धर्मनिरपेक्ष जनता दलातील बहुतांशी पदाधिकारी व कार्यकर्ते समाजवादी पक्षात (Samajwadi Party) सहभागी झाले आहेत. यामध्ये प्रताप होगाडे (Pratap Hogade) यांच्यावर पक्षाच्या प्रदेश कार्याध्यक्षपदाची जबाबदारी सोपविली आहे, तर शिवाजीराव परुळेकर यांची प्रदेश महासचिव तथा प्रदेश किसान संघटनप्रमुखपदी नियुक्ती केली आहे.

प्रदेशाध्यक्ष आझमी (Abu Azmi) यांनी याबाबतची घोषणा केली. राष्ट्रीय अध्यक्ष अखिलेश यादव यांच्या उपस्थितीत सर्वांचा गेल्या सोमवारी लखनऊ येथे पक्षप्रवेश झाला होता. धर्मनिरपेक्ष जनता दलाचे राष्ट्रीय अध्यक्ष एच. डी. देवेगौडा व एच. डी. कुमारस्वामी यांनी दिल्ली येथे केंद्रीय गृहमंत्री अमित शहा व जे. पी. नड्डा यांच्या उपस्थितीत भाजपशी युती करण्याचा निर्णय घेतला.

ही भूमिका महाराष्ट्रातील धर्मनिरपेक्ष जनता दलाकडून अमान्य करण्यात आली. याबाबतची पक्षाची राज्यव्यापी बैठक घेऊन या निर्णयाचा निषेध नोंदविला. तसेच या युतीमध्ये सहभागी न होण्याचा निर्णय घेतला. त्यानंतर पदाधिकारी व कार्यकर्त्यांनी प्रवेशासाठी राष्ट्रीय जनता दल, समाजवादी पक्ष व तत्सम्‌ पर्याय सुचविले.

याबाबत अंतिम निर्णय घेण्यासाठी एक समिती स्थापन केली. आठजणांच्या या समितीने संबंधित पक्षनेत्यांशी व संबंधितांशी चर्चा करणे, योग्य पर्याय निश्‍चित करणे व त्यासाठी आवश्यक ती सर्व कार्यवाही करण्याबाबतचे संपूर्ण अधिकार समितीला दिले.

समितीच्या निर्णयानुसार पुढील वाटचाल करण्यावर एकमत झाले. त्यानंतर समाजवादी पक्षात सहभागी होण्याचा निर्णय झाला. प्रदेशाध्यक्ष आझमी यांच्या उपस्थितीत राष्ट्रीय अध्यक्ष अखिलेश यादव यांची सोमवारी (ता.३०) लखनऊ येथे भेट घेतली. यावेळी धर्मनिरपेक्ष जनता दलाचे प्रमुख दहा पदाधिकारी उपस्थित होते. यादव यांनी समाजवादी पक्षात स्वागत केले.

नऊजणांची विविध पदांवर वर्णी

दरम्यान, प्रदेशाध्यक्ष आझमी यांनी धर्मनिरपेक्ष जनता दलातून आलेल्या प्रमुख नऊ जणांची विविध पदांवर नियुक्ती जाहीर केली. यामध्ये होगाडे यांच्यावर प्रदेश कार्याध्यक्ष पदाची जबाबदारी सोपविली आहे. होगाडे धर्मनिरपेक्ष जनता दलाचे प्रदेश महासचिव होते. तसेच ते वीज तज्‍ज्ञ व समाजवादी विचाराचे व्यक्तिमत्त्व म्हणूनही परिचित आहेत.