बेळगाव : विविध कारणांनी सीमाभागातील मराठी भाषिकांना त्रास देणाऱ्या कन्नड संघटनांनी आता चित्रपटांना लक्ष करण्यास सुरवात केली आहे. शुक्रवारी बेळगाव व इतर भागातील चित्रपट गृहात जाऊन तानाजी चित्रपट बंद पाडण्याचा प्रयत्न केला. तसेच तानाजी चित्रपटाचे पोस्टर फाडून त्याला आग लावण्याचा प्रयत्न करण्यात आला. त्यामुळे सीमावासीयांमधून तिव्र नाराजी व्यक्त केली जात आहे. ग्लोब टॉकीज येथे आलेल्या कन्नड संघटनेच्या कार्यकर्त्यांनी चित्रपटाचे पोस्टर काढा आणि चित्रपट बंद करा अशा घोषणा देत चित्रपट गृहातील कर्मचारी वर्गावर दादागिरी केली. त्यामुळे परिसरात एकच गोंधळ माजला होता. बेळगावसह धारवाड, दावनगिरी येथेही चित्रपटाचे प्रदर्शन बंद पाडण्याचा प्रयत्न कन्नड संघटनेच्या कार्यकर्त्यांनी केला आहे.

हे पण वाचा -  पहिल्याच प्रयत्नात बेळगावची मुलगी भारतीय वनसेवेत... 

काही दिवसांपूर्वी कनसे या कन्नड संघटनेच्या म्होरक्‍या भीमाशंकर याने महाराष्ट्र एकीकरण समितीच्या कार्यकर्त्यांना गोळ्या घाला असे वक्तव्य केले होते. याबाबत सीमाभागासह महाराष्ट्रात तिव्र प्रतिक्रिया उमटलेल्या होत्या. तसेच शिवसेनेने भीमाशंकर याचा पुतळा जाळून कन्नड संघटनांचा निषेध नोंदविला होता. याचबरोबर कोल्हापूर येथे कन्नड चित्रपटाचे प्रदर्शन बंद पाडण्यात आले होते. त्यामुळे कन्नड संघटनांनी तानाजी चित्रपटात महाराष्ट्राचा इतिहास असल्याचे सांगत चित्रपटाचे प्रदर्शन बंद करण्याचा प्रयत्न केला आहे. कन्नड संघटनेच्या धमकीमुळे ग्लोब टॉकीजवरील पोस्टर खाली उतरविण्यात आले आहे. कन्नड संघटनेच्या दादागिरीचा महाराष्ट्र एकीकरण समितीतर्फे जाहीर निषेध करण्यात आला आहे.

हे पण वाचा - पोटच्या मुलींना तळ्यात फेकून मातेने ही घेतली तळ्यात उडी...

बेळगाव आणि सिमाभागात कन्नड संघटनांची दादागिरी वाढत असून मराठी भाषिकांना त्रास देणाऱ्या संघटनांना पोलिस पाठीशी घालत आहेत. तानाजी चित्रपटाच्या माध्यमातून त्यांचा इतिहास मांडण्यात आलेला आहे. अशा चित्रपटाला विरोध करून कन्नड संघटनांनी विरोध करून आपली लायकी दाखवून दिली आहे. असे मत मराठी भाषिकांमधून व्यक्त होत असून हिंदुत्ववादी पक्ष व संघटना याबाबत काय करणार? असा प्रश्नही विचारला जात आहे.