कोगनोळी : येथे राष्ट्रीय महामार्गावर असणाऱ्या कर्नाटक सीमा तपासणी नाक्यावरुन कर्नाटकात प्रवेश करण्यासाठी लागणाऱ्या आरटी-पीसीआर निगेटिव्ह रिपोर्टची सक्ती राज्य शासनाने रद्द केली आहे. परिणामी आता कर्नाटकात प्रवेश सुलभ झाला असून प्रवाशांना केवळ कोरोना प्रतिबंधक दोन डोस घेतलेला दाखला दाखवावा लागत आहे. कर्नाटक शासनाच्या या निर्णयाचे महाराष्ट्र व कर्नाटकातील सीमाभागातून स्वागत करण्यात येत आहे. मात्र येथील सीमा तपासणी नाक्यावरील पोलिस बंदोबस्त कायम आहे. (Karnataka Entry Vaccination Certificate)

गेल्या दोन वर्षापासून कोगनोळी येथील दूधगंगा नदीवर कर्नाटक सीमा तपासणी नाका उभारण्यात आला आहे. या ठिकाणी महाराष्ट्र व इतर राज्यांतून कर्नाटकात प्रवेश करण्यासाठी आरटी-पीसीआर निगेटिव्ह रिपोर्ट तपासणी करून कर्नाटकात प्रवेश दिला जात होता. महाराष्ट्रासह इतर राज्यातील कर्नाटकात प्रवेश करणाऱ्या वाहनधारकांना या ठिकाणी रोखून त्यांच्याकडे आरटी-पीसीआर निगेटिव्ह रिपोर्टची तपासणी करुन सोडण्यात येत होते. यामुळे महाराष्ट्र व कर्नाटक सीमाभागातील नागरिकांना याचा मोठा त्रास सहन करावा लागत होता.

आता कर्नाटक शासनाने आरटी-पीसीआर निगेटिव्ह रिपोर्टची सक्ती बंद केली आहे. कोरोना प्रतिबंधक दोन डोस घेतलेला दाखला दाखवून आता कर्नाटकात प्रवेश मिळत आहे. त्यामुळे कोगनोळी कर्नाटक सीमा तपासणी नाक्यावरील पोलिस बंदोबस्त कायम राहणार असल्याची माहिती निपाणी ग्रामीण पोलिस ठाण्याचे उपनिरीक्षक अनिल कुंभार यांनी दिली.

शनिवारी (ता. 12) बंदोबस्तवरील पोलिस कर्मचाऱ्यांनी महाराष्ट्र व इतर राज्यांतून कर्नाटकात प्रवेश करणाऱ्या वाहनधारकांकडे कोरोना प्रतिबंधक दोन डोस घेतल्याच्या दाखल्याची तपासणी केली. यामुळे या ठिकाणी होणारी मोठी गर्दी कमी झाली होती.

दिवसभर येथे निपाणीचे मंडल पोलिस निरीक्षक संगमेश शिवयोगी यांच्या मार्गदर्शनाखाली निपाणी ग्रामीण पोलिस ठाण्याचे उपनिरीक्षक अनिल कुंभार, कोगनोळी पोलिस चौकीचे सहाय्यक उपनिरीक्षक एस. आय. कंभार, सहाय्यक उपनिरीक्षक एस. ए. टोलगी, राजू गोरखनावर, प्रकाश माने, दुंडाप्पा सनदी, आरोग्य सेविका विद्या पाटील, आशा कार्यकर्त्या मंगल माने यांनी चोख बंदोबस्त ठेवला होता.