कोगनोळी : राज्य सरकारच्या आदेशानुसार राष्ट्रीय महामार्गावर असणाऱ्या येथील कर्नाटक सीमा तपासणी नाक्यावर कडक बंदोबस्त ठेवला आहे. महाराष्ट्र व अन्य राज्यातून कर्नाटकात प्रवेश करणाऱ्या प्रवाशांकडे आरटीपीसीआर अहवालाची मागणी केली जात आहे. सकाळी दहा वाजता या तपासणी नाक्यावर महाराष्ट्रातून कर्नाटकात प्रवेश करणाऱ्या नामवंत डॉक्टर व पोलिसामध्ये चांगलीच बाचाबाची झाल्याची माहिती समोर आली आहे.

मूळचे कोल्हापूर येथील डॉ. लिंगराज बाळासाहेब स्वामी हे कर्नाटकात प्रवेश घेण्यासाठी आले. काल रात्रीपासून अचानक अहवाल तपासणी सुरू असल्याने या ठिकाणी गर्दी झाली आहे. लिंगराज याठिकाणी आले असता गाडी का थांबली या कारणावरून पोलिस व त्यांच्यात शाब्दिक बाचाबाची झाली. यावेळी उपस्थित पोलिसांनी लिंगराज यांना बेळगाव येथील रुग्णालयात जाणार असल्याने सोडले.