इचलकरंजी - येथील शांतीनगरातील कंजारभाट वसाहतीमध्ये एका गंवडी काम करणाऱ्या तरुणावर सशस्र हल्ला करुन खून करण्यात आला. रामा कचरु गरड (रा.जयभीमनगर झोपडपट्टी, इचलकरंजी) असे खून झालेल्या तरुणाचे नाव आहे.

पोलिसांनी दिलेल्या माहितीनुसार रामा गरड हा गंवडी काम करत होता. गेल्या काही दिवसापासून त्याचे काम बंद असल्याने घरी होता. आज दुपारी साडेबारा वाजण्याच्या सुमारास तो मोटरसायकल घेवून घरातून बाहेर पडला. डॉ.बाबासाहेब आंबेडकर पुतळ्याहून महासत्ता चौकाकडे जाणाऱ्या रिंग रोडने तो जात होता. याचवेळी मोटरसायकलवरुन हल्लेखोरांनी त्याचा पाठलाग सुरु केला. हल्लेखोर पाठलाग करत आहेत हे लक्षात येताच त्याने मोटारसायकल सोडून तो पळत सुटला. पण पळत जाताना शांतीनगरातील कंजारभाट वसाहतमधील चौकात  त्याचा पाय घसरला  व तो खाली पडला. याच दरम्यान तेथे हल्लेखोरांनी त्याच्यावर सशस्र हल्ला करुन त्याचा खून केला. 

या घटनेची माहिती समजताच अप्पर पोलीस अधिक्षक श्रीनिवास घाडगे, पोलिस उपाधिक्षक कृष्णात पिंगळे यांनी घटनास्थळी धाव घेतली. घडल्या घटनेची माहिती घेवून हल्लेखोराच्या शोधासाठी वेगवेगळी पोलिस पथके तयार केली आहेत.