कोल्हापूर : हार्डवेअर व सॉफ्टवेअरसह आयटीचे क्‍लस्टर असणाऱ्या ‘इलेक्‍ट्रॉनिक्‍स पार्क’मधून पाच ते दहा हजार रोजगार उपलब्ध होणार आहेत. कोल्हापूर जिल्ह्यात पार्कसाठी ग्रीन सिग्नल मिळाल्यावर केंद्र, राज्य सरकार व वेस्टर्न महाराष्ट्र चेंबर ऑफ कॉमर्स अॅण्ड इंडस्ट्रीजच्या सहकार्यातून त्याचा डोलारा उभारला जाईल. परिणामी, कोल्हापूर जिल्ह्यात तो व्हावा, यासाठी वेस्टर्न महाराष्ट्र चेंबर ऑफ कॉमर्स अॅण्ड इंडस्ट्रीजच्या पदाधिकाऱ्यांच्या हालचाली सुरू झाल्या आहेत.  

हेही वाचा - कोल्हापुरात निर्भया पथकांची गस्त वाढणार ; १०९१ नंबरवर करा संपर्क -

पार्कसाठी २०० एकर जागा आवश्‍यक आहे. केंद्र सरकार १४० कोटी रुपये अनुदान देणार आहे, राज्य सरकारने जागा उपलब्ध करून द्यायची आहे. वेस्टर्न चेंबर ऑफ कॉमर्स अॅण्ड इंडस्ट्रीज हार्डवेअर अॅण्ड सॉफ्टवेअर कंपन्यांना आमंत्रित करण्याची जबाबदारी पेलणार आहे. रिसर्च अॅण्ड डेव्हलपमेंट, उत्पादन, डिझाईनचे काम पार्कमध्ये सुरू राहील. मात्र, लीड इलेक्‍ट्रॉनिक कंपनीने ३०० कोटींची गुंतवणूक करणे जरुरीचे आहे. संबंधित कंपनीला २०० एकरपैकी २५ ते ३० एकर जागा द्यावी लागेल. त्या जागेवर कंपनीला प्रोजेक्‍ट सुरू करता येणार आहे.

राज्य सरकारने जागा उपलब्ध केल्यानंतर पार्कमध्ये रस्ते, ड्रेनेज सुविधा उपलब्ध होईल. कॉमन फॅसिलिटेशन सेंटरकरिता ७५ कोटी रुपये अनुदान मिळणार असून, पार्कमध्येच ते साकारले जाणार आहे. स्पेअर पार्टपासून इलेक्‍ट्रॉनिक्‍स वस्तूंची निर्मिती करणाऱ्या छोट्या कंपन्यांना इलेक्‍ट्रॉनिक्‍स इंडस्ट्रियल शेड तयार केले जाईल. त्यात दोनशे कंपन्या येणे अपेक्षित आहे. आयटी कंपन्यांसाठी २० टक्के जागा पार्कमध्ये असेल. केंद्र, राज्य व चेंबर ऑफ कॉमर्स अॅण्ड इंडस्ट्रीजची संयुक्त कंपनी अस्तित्वात येणार आहे.

जिल्ह्यातील स्थिती अशी : 

- इलेक्‍ट्रॉनिक्‍स कंपन्या - ३२ 
- विमानतळाची उपलब्धता  
- मुबलक कुशल मनुष्यबळ 
- शिरोली, वडगाव- तासगाव, कागल 
- फाईव्ह स्टारसह अन्य जागांचा शोध

हेही वाचा - रात्रीस खेळ फक्त शर्यतींचा चाले ; कोणत्याही परिस्थितीत शर्यत होणारच -

पार्कमधून काय होणार..? 

- तीन हजार कोटी रुपयांची गुंतवणूक
- पाच ते दहा हजार रोजगार उपलब्ध
- टुरिझम इंडस्ट्री डेव्हलपमेंटला मोठी संधी 
- प्रदूषण न करणाऱ्या ॲक्‍टिव्हिटी होणार 
- आवश्‍यकतेनुसार कंपन्या प्रशिक्षण देणार 
 

"प्रत्येक जिल्ह्यात एक आयटी पार्कची केंद्र सरकारची योजना बंद झाली आहे. त्याऐवजी हार्डवेअर अॅण्ड सॉफ्टवेअरसह आयटी कंपन्यांना सामावून घेणारा इलेक्‍ट्रॉनिक्‍स पार्क उभारण्याची योजना आकाराला आली. पालकमंत्री सतेज पाटील व जिल्हाधिकारी दौलत देसाई यांच्याशी चर्चा केली जाणार आहे."

 
- ललित गांधी, अध्यक्ष, वेस्टर्न महाराष्ट्र चेंबर ऑफ कॉमर्स अॅण्ड इंडस्ट्रीज

संपादन - स्नेहल कदम