जयसिंगपूर: शिरोळ तालुक्यात ५० टक्के नागरीकांचे लसीकरण पूर्ण झाले आहे. लसीकरणाची गती वाढवून कोरोनावर मात करण्याच्या दृष्टीने आरोग्य विभागाचे प्रयत्न सुरू असल्याची माहिती, तालुका वैद्यकीय अधिकारी डॉ. पी. एस. पाखरे यांनी दिली.

ते म्हणाले, ‘जयसिंगपूरसह मोठ्या गावांवर लक्ष केंद्रीत केले जात आहे. तालुक्यात ८ प्राथमिक आरोग्य केंद्र, ३३ आरोग्य उपकेंद्र, २ ग्रामीण रुग्णालये, एक जिल्हा परिषद दवाखान्यांमधून लसीकरण करण्यात येत आहे. शिवाय ज्या गावात आरोग्य उपकेंद्र नाही तेथे शाळांमध्ये लसीकरण करण्यात येत आहे.’

१८ वर्षांवरील ३ लाख ३६ हजार १४२ नागरिकांचे लसीकरण केले आहे. यामध्ये आरोग्य कर्मचारी, फ्रंटलाईन वर्कर व १८ वरील नागरिकांचा समावेश आहे. १८ ते ४४ वयोगट- ५८ हजार ७१०, ४५ ते ५९ वयोगट- ५३ हजार ४१८ व ६० वरील वयोगट- ४५ हजार ७५७ असे एकूण १ लाख ६८ हजार ३९ जणांचे लसीकरण पूर्ण झाले आहे. सध्या प्रत्येक आरोग्य केंद्राकडे लसीचा पुरवठा आहे.

१८ वरील सर्व नागरिकांनी पहिला किंवा दुसरा डोससाठी बाहेर नोंदणी करण्याची गरज नाही. थेट लसीकरण केंद्रावर नोंदणी करण्याची सोय उपलब्ध करून दिली आहे. जयसिंगपूर, शिरोळ, कुरूंदवाड, अब्दुललाट, उदगाव, नांदणी, दानोळी या गावांची लोकसंख्या मोठी असल्याने येते लसीकरणाची टक्केवारी वाढवण्यासाठी विषेश प्रयत्न करण्यात येणार आहेत. त्याचबरोबर उर्वरित गावांतील नियोजन करून लसीकरण पूर्ण करणार असल्याचे त्यांनी सांगितले.