कोल्हापूर : कोल्हापूर शहरात संशयितरित्या 63 मुस्लीम मुलांना घेऊन जाणारा ट्रक पकडला आहे. हे मुले पश्चिम बंगालहून आली असल्याची माहिती असून या मुलांना पोलिसांनी ताब्यात घेतले आहे. तर ट्रकचालकाला यासंबंधित विचारले असता त्याने घटनास्थळावरून पोबारा केला आहे.

अधिक माहितीनुसार, कोल्हापुरातील रूईकर कॉलनी येथे सकाळी एक ट्रक उभा होता. त्यावेळी त्या ट्रकमध्ये काही मुस्लीम मुले चढताना दिसत होती. बराच वेळ ही हालचाल पाहिल्यानंतर भारतीय जनता पक्षाच्या युवा मोर्चाच्या काही पदाधिकाऱ्यांनी याबद्दल ट्रक चालकाला विचारणा केली असता तो फोन आल्याच्या बहाण्याने पळून गेला.

यानंतर या पदाधिकाऱ्यांनी हा ट्रक शाहुपुरी पोलिसांच्या ताब्यात दिला. ट्रकमधील मुस्लीम मुलांना विचारणा केली असता ते बिहारमधून आले असल्याचं त्यांनी सांगितलं पण कुठे जाणार असं विचारलेल्या प्रश्नाचे उत्तर त्यांच्याकडे नव्हते. त्यातील एका जणाकडे पश्चिम बंगालमधील हावडा स्टेशन ते पुणे स्टेशनपर्यंतचे तिकीट असल्याचं आढळले आहे.

ही मुले कोल्हापुरातील आजरा येथे मदरशात शिक्षणासाठी आले असल्याची माहिती असून ते सुट्टीसाठी गावी गेले होते आणि सुट्टी संपवून ते पुन्हा आजरा येथे शिक्षणासाठी परत येत असल्याची माहिती प्राथमिक चौकशीतून समोर आली आहे.

त्यानंतर या मुलांची बालसंकुलात रवानगी करण्यात आली आहे. पण पश्चिम बंगालमधून केवळ शिक्षणासाठी आजरा येथे मुले का येतात असा प्रश्न निर्माण झाला आहे.