कोल्हापूर : वस्त्रनगरी इचलकरंजी, गडहिंग्लज, कागलसह जिल्ह्यातील ८ बसस्थानकांचे रुपडे लवकरच पालटणार आहे. त्यांच्या नूतनीकरणासाठी ११ कोटी ९४ लाख रुपयांचा निधी मंजूर झाला आहे. या निधीला प्रशासकीय मंजुरी मिळाली असून, त्यांची कामे लवकरच सुरू होतील. जिल्ह्यातील बसस्थानकांमध्ये हजारो प्रवाशांची वर्दळ असते. ही बसस्थानके विकसित होणार असल्याने त्याचा फायदा प्रवाशांना होणार आहे, अशी माहिती पालकमंत्री तथा परिवहन राज्यमंत्री सतेज पाटील यांनी दिली.

त्यांनी प्रसिद्धी पत्रकात म्हटले आहे की, इचलकरंजी, गडहिंग्लज बसस्थानकाच्या नूतनीकरणासाठी, तर जयसिंगपूर बसस्थानकाच्या विस्तारीकरणासाठी प्रत्येकी २ कोटींचा निधी मंजूर झाला आहे. वाठार बसस्थानक पुनर्बांधणीसाठी दीड कोटी रुपये, तर वडगाव बसस्थानक नूतनीकरणासाठी १ कोटी ४४ लाख रुपये मिळणार आहेत. त्याचबरोबर कागल, गगनबावडा व मलकापूर बसस्थानक नूतनीकरणासाठी प्रत्येकी १ कोटीच्या निधीला प्रशासकीय मान्यता मिळाली आहे. आठही बसस्थानकांच्या विकासकामांना लवकरच सुरुवात होणार आहे. यामध्ये नवीन इमारतीसह सुशोभीकरण, काँक्रिटीकरण, प्रसाधनगृह, हायमास्ट दिवे आदी कामे होणार आहेत. हे काम राज्यातील अन्य बसस्थानकांसाठी आदर्शवत आणि अनुकरणीय ठरेल, असा विश्वास पाटील यांनी व्यक्त केला आहे. निधी मंजुरीसाठी मुख्यमंत्री उद्धव ठाकरे, उपमुख्यमंत्री अजित पवार, परिवहनमंत्री अनिल परब, महसूलमंत्री बाळासाहेब थोरात यांचे सहकार्य लाभले.