बेळगाव : कानात हेडफोन घालून सुसाट वेगाने चाललेल्या दुचाकीचालकाने गणपत गल्लीतील चार वर्षाच्या मुलाला उडविले. या धडकेत मुलगा खाली पडल्यानंतर दुचाकीची दोन्ही चाके त्याच्या पोटावरून गेली. शिवाय मुलाच्या डोक्‍यालाही दुखापत झाली. या घटनेनंतर गणपत गल्लीतील नागरिकांनी पाठलाग करून त्या दुचाकीस्वाराला पकडून पोलिसांच्या स्वाधीन केले. दरम्यान, जखमी मुलाला उपचारासाठी खासगी रुग्णालयात दाखल करण्यात आले आहे. 

घटनास्थळावरुन मिळालेली अधिक माहिती अशी की, दुचाकीसोबत मुलगा दहा ते पंधरा फूट फरफटत गेला. घटना घडल्यानंतर नागरिकांनी आरडाओरड सुरू केली, पण दुचाकीचालकाने कानात हेडफोन घातल्यामुळे त्याला काहीच ऐकू आले नाही. घटना घडल्यानंतर दुचाकीचालक पळून जाण्याच्या प्रयत्नात होता, पण भातकांडे गल्लीच्या कोपऱ्यापर्यंत पाठलाग करुन त्याला पकडण्यात आले. त्यानंतर पोलिसानी वेळेत तेथे जाऊन दुचाकीस्वाराला ताब्यात घेतले. घटनेनंतर गणपत गल्लीत काही काळ गोंधळाचे वातावरण निर्माण झाले होते.

हेही वाचा - उमेदवारीच्या आमिषाने घातला १० कोटीचा गंडा ; भाजपच्या स्थानिक नेत्यांमध्ये रंगली चर्चा
 

जखमी चार वर्षाचा मुलगा आई-वडिलांसह गणपत गल्लीतून निघाला होता. त्याचवेळी सुसाट वेगाने येणाऱ्या दुचाकीचालकाने त्या मुलाला उडविले. सायंकाळी गणपत गल्लीत गर्दी असते. बेळगावच्या मुख्य बाजारपेठेचा हा भाग असला तरी वाहतूक कोंडी टाळण्यासाठी तेथे एकेरी वाहतूक व्यवस्था आहे. तरीही तेथे दुहेरी वाहतूक सुरूच असते. शिवाय गर्दीतून बेफाम वाहने चालविण्याचा प्रकारही अनेकदा घडतो. पोलिसांचे नियंत्रण नसल्यामुळे असे प्रकार घडतात. शुक्रवारी घडलेल्या या प्रकारानंतर तरी पोलिसांनी बेफाम वाहन चालविणाऱ्यांवर कारवाई करावी, अशी मागणी होत आहे.

संपादन - स्नेहल कदम