कसबा सांगाव : शिवाजीनगर (मौजे सांगाव) येथील अमोल अर्जुन पाटील या युवा शेतकऱ्याने १४ गुंठ्यांत २१ टन टोमॅटो उत्पादन घेऊन सुमारे ११ लाखांचा नफा मिळविला. पारंपरिक ऊस पीक उत्पादनाला फाटा देत शेतीत धाडसी निर्णय करून घेतलेले उत्पादन अन्य शेतकऱ्यासाठी प्रेरणादायी आहे.

विशेष म्हणजे कागल पंचतारांकित औद्योगिक वसाहतीमधील खासगी कंपनीत काम करत असतानाही त्याचे शेतीतील यश उल्लेखनीय आहे.

सांगाव परिसरात बहुतांश शेतकऱ्याकडून ऊस पीक घेतले जाते. ऊस पिकाची तोडणी झाल्यानंतर काही शेतकरी भाजीपाला पिकवण्यासाठी प्रयत्नशील असतात. वृक्षसंवर्धन, रोपांचे कलम आदींची आवड असणाऱ्या अमोलने असाच प्रयत्न करण्याचे ठरविले आणि टोमॅटो पिकवण्याचा निर्णय घेतला.

पहिल्या प्रयत्नात पिकांसह कमी दराचा फटका बसल्याने त्याचे नुकसानही झाले, पण खचून न जाता फेब्रुवारीच्या सुमारास १४ गुंठ्यांत साधारण ३६०० टोमॅटो रोपांची लागण केली. भगवान तोडकर, विजय पाटील, कृष्णात पाटील या शेतीतील माहितगार व्यक्तींचा सल्ला घेतला. सातत्याने पीक पाहणी करून खते आणि औषध फवारणी केली. लागण केल्यानंतर साधारण अडीच महिन्यांनी सुरू झालेली तोड पुढील दोन महिने सुरू राहिली. अवघ्या पाच महिन्यात टोमॅटो पीक घेऊन पुन्हा नवीन उपक्रम राबवण्याचा प्रयत्न अमोल ने सुरू केला आहे.

सकस आणि चांगल्या प्रतीचा फळ भाजीपाला पिकवणे ध्येय आहे. खर्चिक शेतीची अनास्था वाढल्याने गट शेती, अवजारे बँक, बीज बँक, औषधे आणि खतनिर्मितीसाठी जोमाने काम करण्याचे ठरविले आहे. मिळालेल्या उत्पन्नात समाधानी आहे

- अमोल पाटील, युवा शेतकरी, मौजे सांगाव.