भिलवडी (सांगली) : उपमुख्यमंत्री अजित पवार (Ajit Pawar) यांनी सांगली जिल्ह्यातील भिलवडी (Bhilvadi) गावांमध्ये शाळेत जाऊन पूरछावणीला भेट दिली. या शाळेमध्ये पूरग्रस्तांशी त्यांनी संवाद साधला. पूरग्रस्तांची राहण्याची, जेवणाची सोय आहे का? याची विचारपूस केली. त्यानंतर उपमुख्यमंत्री अजित पवार आणि पालकमंत्री जयंत पाटील (Jayant patil) यांनी भिलवडी गावातील बाजारपेठेची पाहणी केली. सांगली जिल्ह्यातील भिलवडी या गावाला पुराचा मोठा फटका बसतो यावर्षीही या गावात मोठ्या प्रमाणात नुकसान झाले आहे. या पार्श्वभूमीवर मंत्र्यांनी या गावांना भेटी देऊन तेथील पाहणी केली.

यावेळी पवार म्हणाले, भिलवडी परिसरातील ज्या भागातील घरांना आणि रहिवाशांना वारंवार पुराचा फटका बसतो अशा घरांचा सर्व्हे करा. वारंवार पुराचा फटका बसणाऱ्या घरांचे उंचावरील जागेवर पुनर्वसन करण्यासाठी जागेची उपलब्धता तातडीने तपासण्याच्या सूचना उपमुख्यमंत्री अजित पवार यांनी उपस्थित असणाऱ्या प्रशासकीय अधिकाऱ्यांना दिल्या. भिलवडी गावातील पुरग्रस्तांच्या व्यथा ऐकल्यानंतर त्यांच्या पुनर्वसन आणि मदतीसाठी चांगला मार्ग काढण्याचे आश्वासन देत संकटाच्या काळात राज्य सरकार प्रत्येक नागरीकाच्या पाठीशी ठामपणे उभे असल्याची ग्वाही उपमुख्यमंत्री अजित पवार यांनी दिली.

भिलवडी बाजारपेठेची उपमुख्यमंत्री अजित पवार यांच्याकडून बोटीतून पाहणी

येथील बाजारपेठ पुर्णपणे पाण्याखाली आहे, पाणी भरलेल्या बाजारपेठेची उपमुख्यमंत्री अजित पवार यांनी बोटीतून जाऊन पाहणी केली. यावेळी जलसंपदा मंत्री जयंत पाटील, मदत व पुनर्वसन मंत्री विजय वडेट्टीवार, कृषी राज्यमंत्री विश्वजीत कदम व इतर मान्यवर उपस्थित होते.