गडहिंग्लज : कोरोना काळात काम केलेल्या आशा स्वयंसेविका व अंगणवाडी कर्मचाऱ्यांचा प्रोत्साहन भत्ता जमा केला आहे. त्यासाठी पंचायत समितीच्या शेष फंडातून तीन लाख 72 हजार 500 रुपयांचा निधी दिला आहे. तालुक्‍यातील 745 आशा-अंगणवाडी कर्मचाऱ्यांना याचा लाभ झाला आहे. अशा प्रकारे प्रोत्साहन भत्ता देणारी गडहिंग्लज पंचायत समिती एकमेव आहे. 

गतवर्षी मार्च महिन्यापासून कोरोनाचा प्रादुर्भाव वाढला. दिवसागणिक रुग्ण संख्या वाढू लागली. त्याचा आरोग्य यंत्रणेवर प्रचंड ताण आला. संसर्ग रोखण्यासाठी घरोघरी सर्वेक्षण सुरु केले. या कामाची जबाबदारी आशा स्वयंसेविका, अंगणवाडी सेविका व मदतनीस यांच्यावर सोपविली होती. स्वत:चा जीव धोक्‍यात घालून कोरोना संसर्गाच्या काळात रोज 100 कुटुंबांना भेटी दिल्या जात होत्या. कोरोनाचा संसर्ग रोखण्यात आशा व अंगणवाडी कर्मचाऱ्यांचे योगदान होते. 

समाजासाठी अत्यंत गरजेच्या काळात त्यांनी केलेल्या कामाची दखल घेत येथील पंचायत समितीने प्रोत्साहन भत्ता देण्याचा निर्णय घेतला होता. पंचायत समिती सभेत त्याबाबतचा ठरावही करण्यात आला होता. 

भत्ता देणारी एकमेव पंचायत समिती 
दरम्यान, प्रत्येकी 500 रुपयांप्रमाणे तीन लाख 72 हजार 500 रुपयांची तरतूद केली. त्यासाठी पंचायत समितीच्या शेष फंडातून निधी उपलब्ध केला आहे. आशा स्वयंसेविका व अंगणवाडी कर्मचाऱ्यांच्या खात्यावर नुकताच हा निधी वर्ग केला आहे. कोरोना काळात केलेल्या कामापोटी अशा प्रकारे प्रोत्साहन भत्ता देणारी गडहिंग्लज पंचायत समिती एकमेव आहे, हे विशेष. 

संपादन - सचिन चराटी

kolhapur