कोल्हापूर : जिल्हा बँकेच्या (District Bank election) निवडणुकीत पतसंस्था गटातून आमदार प्रकाश आवाडे यांनी सत्तारूढ आघाडीतील उमेदवारीची स्वतःच घोषणा केल्यानंतर या गटातील संचालक अनिल पाटील (Anil Patil) यांनी लढण्याचा निर्णय जाहीर केला. या पार्श्‍वभूमीवर अनिल पाटील यांची मनधरणी करण्याचे प्रयत्न सुरू आहेत. प्रकाश आवाडे (Prakash aawade) यांनी माजी आमदार महादेवराव महाडिक, (Mahadevrao Mahadik) पतसंस्था फेडरेशनचे उपाध्यक्ष शंकर पाटील यांची भेट घेतली.

पाच वर्षापूर्वी झालेल्या निवडणुकीत अनिल पाटील यांनी सत्तारूढ गटाच्या विरोधात निवडणूक लढवली. त्यात ते चार मतांनी विजयी झाले होते. यावेळीही ते सत्तारूढमधून या गटाचे प्रबळ दावेदार होते. (KDCC Election 2021) भाजपला सोबत घेऊन निवडणूक बिनिविरोध करण्याच्या प्रक्रियेतील तो महत्वाचा भाग होता. पण तत्पुर्वीच श्री. आवाडे यांनी सत्तारूढकडून याच गटातील उमेदवारी नेत्यांच्या मंजुरीचा हवाला देत जाहीर केली. त्यामुळे या गटातील विद्यमान संचालक श्री. पाटील यांच्यासह अर्जुन आबिटकर यांच्यात अस्वस्थता होती.

प्रकाश आवाडे यांच्या घोषणेनंतर दुसऱ्याच दिवशी श्री. पाटील यांनी आपणही या गटातून रिंगणात उतरण्याचा निर्धार जाहीर केला. पाच वर्षापूर्वीच्या निकालाची पुनरावृत्ती टाळण्यासाठी श्री. आवाडे यांनी श्री. पाटील यांची मनधरणी करण्याचे प्रयत्न सुरू केले आहेत. याबाबत आज त्यांनी महादेवराव महाडीक, शंकर पाटील यांची राजाराम कारखान्यावर भेट घेतली. चर्चेत भाजपचे प्रदेशाध्यक्ष आमदार चंद्रकांत पाटील (Chandrakant patil) यांच्याशीही फोनवरून चर्चा केल्याचे समजते. माजी खासदार कल्‍लाप्पा आवाडे यांच्याशीही फोनवरून चर्चा घडवून आणली.

चंद्रकांत पाटील घेणार निर्णय

संचालक अनिल पाटील हे भाजपचे (BJP) संचालक म्हणून निवडून आले आहेत. त्यामुळे त्यांना सत्तारूढ गटाकडून उमेदवारी मिळण्याची शक्यता होती. आता याचा निर्णय भाजपचे प्रदेशाध्यक्ष पाटील घेणार आहेत. एक-दोन दिवसांत ते कोल्हापुरात (Kolhapur Election) येणार असून त्यावेळी ही चर्चा होईल. आवाडे, कोरे हे सद्या भाजपसोबत असल्याने पाटील यांच्या निर्णयाला महत्त्व येणार आहे.