कोल्हापूर : अयोध्या येथील श्री राम मंदिर लोकार्पणानिमित्त येथे होणाऱ्या आनंदसोहळ्याची तयारी अंतिम टप्प्यात आली आहे. काल रात्री ऐतिहासिक दसरा चौकात (Dasara Chowk) प्रभू श्री रामांची १०८ फुटी भव्य प्रतिमा उभारण्यात आली आहे. आज (शनिवारी) दुपारी साडेबारा वाजता राज्याचे तंत्र शिक्षण मंत्री चंद्रकांत पाटील यांच्यासह खासदार धनंजय महाडिक (Dhananjay Mahadik) यांच्या उपस्थितीत त्याचे अनावरण होणार आहे.

दरम्यान, रविवार (ता.२१) पासून सलग दोन दिवस येथे आनंदसोहळ्यानिमित्त भरगच्च कार्यक्रम होणार आहेत. दरम्यान, श्रीराम आणि मंदिर प्रतिकृती असलेल्या भगव्या ध्वजासह टी-शर्ट, आकाशकंदिलांना मागणी वाढली आहे.

शिवाजी चौकात प्रतिष्ठापना सोहळ्याचे प्रसारण

श्री राम मंदिर लोकार्पण (Ayodhya Ram Mandir) सोहळ्याच्या पार्श्वभूमीवर रविवार (ता.२१) पासून येथे आनंदोत्सव सोहळा होणार आहे. छत्रपती शिवाजी चौकात अकरा फुटी भव्य मुर्ती दर्शनासाठी खुली होणार आहे. त्याशिवाय प्राणप्रतिष्ठा सोहळ्याचे थेट प्रसारण सोमवारी (ता.२२) दुपारी बारापासून होणार असल्याची माहिती विश्व हिंदू परिषदेचे संपर्क प्रमुख संभाजी साळुंखे यांनी पत्रकार परिषदेत दिली. सोमवारी (ता. २२) सकाळी गाईच्या पूजनानंतर छत्रपती शिवरायांच्या पुतळ्यावर सप्तगंगेच्या जलाने जलाभिषेक होवून गुढी उभारली जाईल, असे प्रसाद वळंजू यांनी सांगितले. यावेळी विशाल पाटील, अवधूत भाटे, पांडुरंग पाटील, अमोल पाटील, सुहास शिंदे आदी उपस्थित होते.

धार्मिक स्थळे, मंदिरांची स्वच्छता

रुईकर कॉलनी परिसरातील मंदिरांची खासदार धनंजय महाडिक यांनी आज महापालिकेच्या अधिकारी व कर्मचाऱ्यांसह स्वच्छता केली. महापालिकेच्या वतीने शहरातील मंदिरांची व मुख्य रस्त्यांची स्वच्छता मोहिम हाती घेतली आहे. या मोहिमेअंतर्गत शहरातील २०९ मंदिरांची स्वच्छता झाली. अतिरिक्त आयुक्त रविकांत आडसूळ, माजी नगरसेवक सत्यजित कदम, वैभव माने, मुख्य आरोग्य निरीक्षक जयवंत पवार यांच्यासह महापालिकेच्या तीनशे कर्मचाऱ्यांचा मोहिमेत सहभाग होता.