बेळगाव - लहान मुले कधी काय करतील याचा नेम नसतो. त्यामुळे अनेकदा त्यांच्या चुकीमुळे मोठा अनर्थ घटल्याच्या अनेक घटना आतापर्यंत घडल्या आहेत. असाच एक प्रसंग बेळगाव जवळील गावामध्ये घडला असुन वडीलांसोबत शिवारात गेलेल्या लहान बालकाने चक्‍क नाग सापाला स्पर्श केला. त्यामुळे बाळासह त्याच्या वडीलांच्या हृदयाचा ठोका चुकला मात्र तो साप फणा काढत शिवारातुन दुर गेल्याने त्या बाप लेकाचा जीव वाचला. परंतु आपला लाडका चिमुकला शिवारात बागडत असतानाचा वडीलांनी मोबाईलवर केलेला व्हिडीओ पाहिल्यानंतर तो प्रसंग किती भयंकर होता याची कल्पना येत आहे.

वाचा - धक्कादायक : तर कोरोनाचा संसर्ग रोखणारी 'ही' वस्तू वाढवू शकते संसर्ग...

शहरापासुन सहा किलो मिटर अंतरावर असणाऱ्या कंग्राळी बुद्रुक येथील एक पालक आपल्या लहान मुलाला घेऊन शिवारात गेले होते. शिवारात गेल्यानंतर तो चिमुकला आनंदात बागडत होता. शिवारातील काम संपल्यानंतर त्याच्या वडीलानी त्याला अनेकदा घरी जाण्यासाठी आवाज दिला तरीही तो ऐकत नसल्याने त्याचा व्हिडीओ करीत आवाज देण्यास सुरुवात केली. वडील व्हिडीओ करीत असताना मुलगा चालत नाग सापाजवळ गेला. तोपर्यंत त्याच्या वडीलांनाही नाग साप शिवारात असल्याची कल्पना नव्हती, मात्र मुलाने सापाला पकडताच सापाने काढलेला फणा पाहुन बाळासह ते प्रचंड घाबरुन गेले आणि पळत बाळाकडे धावले मात्र तो नाग आपल्या मार्गाने परत गेला. बाळाने सापाला समोरुन पकडले असते किंवा सापाने द्वंश केला असता तर ? अशा अनेक शंकांमुळे त्यांचा जीव अनेक तास कासावीस झाला होता.
बेळगाव शहर आणि परिसरातील शिवारात नाग व इतर साप मोठ्‌या प्रमाणात आहेत. त्यामुळे शिवारात गेल्यानंतर सर्वांनीच याबाबत काळजी घेणे आवश्‍यक आहे असे मत या घटनेनंतर व्यक्‍त होत आहे.

घडली नाही अप्रिय घटना

चिमुकल्याने नाग सापाला स्पर्श केल्याचा व्हिडीओ सध्या सोशल मिडीयावर चांगलाच हिट होऊ लागला आहे मात्र लहान मुले शिवारात किंवा इतर ठिकाणी बागडत असताना पालकांनी अधिक काळजी घेणे आवश्‍यक आहे. असे मत पालकांमधुन व्यक्‍त होत असुन नाग साप शिवारात शांतपणे पडला होता. त्यामुळेच पालकांना साप दिसुन आला नाही मात्र, सुदैवानेच यावेळी कोणतीही अप्रिय घटना घडली नाही.