बेळगाव - कोरोनामुळे सर्वाधिक मृत्यू नोंद झालेल्या देशातील 16 जिल्ह्यांमध्ये बेळगाव जिल्ह्याचाही समावेश आहे. त्यामुळे बेळगाव जिल्ह्यात कोरोना चाचण्या वाढविण्याचा व मृत्यू दर कमी करण्याचा आदेश केंद्रीय आरोग्य विभागाने दिला आहे. त्यामुळे बेळगाव जिल्ह्यात आता कोरोनाच्या चाचण्या वाढवाव्या लागणार आहेत. केंद्रीय आरोग्य सचिव राजेश भूषण यांनी यासंदर्भातच्या सूचना दिल्या आहेत.

देशातील कर्नाटक, गुजरात, तामिळनाडू व तेलंगणा या राज्यांमधील 16 जिल्ह्यांमध्ये कोरोनाचा मृत्यूदर जास्त आहे. कर्नाटकातील बेळगाव, बंगळूर नगर, गुलबर्गा व उडपी या जिल्ह्यांचा त्यात समावेश आहे. गुजरातमधील अहमदाबाबत व सूरत जिल्ह्यांचा समावेश आहे. तामिळनाडू येथील चेन्नई, कांचीपुरम, राणीपेट, थेणी व थिरूवल्लूर आणि तेलंगणा मधील मेदाचलमलकाजगिरी व हैद्राबाद या दोन जिल्ह्यांमध्ये मृत्यूदर जास्त आहे. त्यामुळे या सर्व जिल्ह्यांबाबत केंद्रीय आरोग्य विभागाने चिंता व्यक्त केली आहे. 

वाचा - पंचगंगेच्या पूरात पाखरांच घरटं चाललं पाण्याखाली, व्हॉट्सअॅप वर व्हिडीओ झाला व्हायरल अन्....

कोरोनाचा संसर्ग कमी करण्यासाठी केंद्र सरकाराने काही मार्गदर्शक तत्वे जाहीर केली आहेत. त्याची काटेकोर अंमलबजावणी करण्याची सूचना आरोग्य विभागाने दिली आहे. कोरोनाचा देशाचा व देशातील राज्यांचा मृत्यू दर किती आहे याची माहिती केंद्रीय आरोग्य विभागाने घेतली आहे. बेळगावसह 16 जिल्ह्यांमधील मृत्यू दर देशाच्या व राज्याच्या मृत्यूदरापेक्षा जास्त आहे, त्यामुळे आरोग्य विभागाने चिंता व्यक्त केली आहे. त्यामुळे या 16 जिल्ह्यांमधील मृत्यूदर कोणत्याही स्थितीत कमी व्हायला हवा असे आरोग्य विभागाला वाटते. बेळगाव जिल्ह्याच्या कोरोना बुलेटीन नुसार 7 ऑगस्ट पर्यंत 93 जणांचा मृत्यू झाला आहे. पण प्रत्यक्षात 209 पेक्षा जास्त जणांचा मृत्यू झाला आहे. ही खरी आकडेवारी केंद्रीय आरोग्य विभागाला कळली तर चिंता वाढण्याची शक्‍यता आहे. या चार राज्यांचे आरोग्य सचिव राष्ट्रीय आरोग्य मिशनचे व्यवस्थापकीय संचालक, जिल्हा आरोग्याधिकारी, रोगनियंत्रण अधिकारी, जिल्हाधिकारी, महापालिका आयुक्त, मुख्य वैद्यकीय अधिकारी, वैद्यकीय अधिक्षक यांच्याशी राजेश भूषण यानी संवाद साधला आहे. त्यात कोरोनाबाधीतांवरील उपचाराकडे गांभिर्याने लक्ष देण्यास सांगीतले आहे.

वाचा - जगामध्ये फेमस का आहे कोल्हापूर ? 'हे' अस्सल कोल्हापूरी ब्रॅण्ड आहेत जगात भारी ! 

गंभीर आजारांमुळे ग्रासलेले लोक, जेष्ठ नागरीक, गर्भवती महिला, लहान मुले यांच्याकडे विशेष लक्ष देणे, यापैकी कोणी कोरोनाबाधीत आढळले तर त्यांच्यावर विशेष उपचार करण्याची सूचनाही देण्यात आली आहे. राज्यात किंवा संबधित जिल्ह्यात कोरोना तपासणीच्या प्रयोगशाळा वाढविणे, कोरोना तपासणीचा वेग वाढविणे, कोरोनाबाधीतांसाठी रूग्णवाहीका वेळेवर उपलब्ध करून देणे, रूग्णवाहीकेची मागणी झाल्यास तातडीने कार्यवाही करणे, खाटांची संख्या वाढविणे, ऑक्‍सीजन सिलिंडरची संख्या वाढविणे या माध्यमातून मृत्यू दर कमी करा असेही संबधित जिल्ह्यांच्या आरोग्य विभागाला सांगण्यात आले आहे. 

संपादन - मतीन शेख