कोल्हापूर - बिब्बा घातलास होय चांगल्या कामात, अशी म्हण आहे, बिब्बा हा सर्वांच्याच वापराचा, अमावस्या, पौर्णिमा आली की, मिरची, लिंबूबरोबर एक बिब्बा काळ्या दोरात ओवून गाडीला बांधतो; मात्र असा औषधी गुणधर्म असलेला बिब्बा दुर्मिळ होत आहे. कुठल्याही खासगी नर्सरीत, शासकीय रोपवाटिकेत मुद्दामहून बिब्ब्याची रोपे करत नाहीत.

निसर्गत: ती कुठेतरी उगवून तयार झालेले झाड असेल तर बिब्बा, बिब्ब्याची गोडांबी गोळा करायला अनेकजण जातात. लक्ष्मीपुरी, कपिलतीर्थ मार्केटमध्ये, किराणा माल, वनौषधी दुकानातील बरणीत हा बिब्बा हमखास दिसतो. विशेषत: काही धार्मिक विधीत तर बिब्ब्याच्या फळाशिवाय काम पूर्ण होत नाही, असे म्हटले जाते. संक्रांतीच्या काळात बिब्ब्याच्या वाळलेल्या गोडांबीच्या माळा पन्हाळा, राधानगरी, शाहूवाडी आदी भागांतून विक्रीसाठी येतात. ज्यांना ही गोडांबी खाल्ली आहे, ते लोक मात्र हमखास ते विकत घेतात. चवीला काहीशी तुरट अन्‌ गोड असते गोडांबी. वाळलेल्या अंजिराप्रमाणे चविष्ट असते. पूर्वी संक्रांतीला बुडुकलीत गाजर, हरबऱ्याचे घट्टे आदी पदार्थांबरोबर गोडांबीही असे; मात्र अलीकडे गोडांबीच्या माळा विक्रीसाठी कमी येऊ लागल्या आहेत.

औषधी गुणधर्म असलेल्या बिब्ब्याचे झाड मात्र शहर परिसरात, रत्याकडेला, महापालिकेच्या कुठल्याही उद्यानात दिसत नाही. कुठी मुद्दामहून कोणी हे झाड लावत नाही. अतिपावसाळी प्रदेशात ते कमी दिसते; मात्र ज्या प्रदेशात पावसाचे प्रमाण कमी असते, तिथे बिब्ब्याचे झाड दिसते; पण ही झाडे कमी झालेली दिसतात, अशी नोंद वनस्पतीशास्त्रज्ञ डॉ. मधुकर बाचूळकर यांनी नोंदविली आहे. गिरगाव, कात्यायनी, कागल, पन्हाळा, शाहूवाडी, निपाणी, गडहिंग्लज, एकोंडी भागांत ही झाडे दिसतात; मात्र पूर्वीसारखी जास्त नाहीत. बेळगावमध्ये बिब्ब्यांची बाजारपेठ असून, अनेक विक्रेते बिब्बे इथे घेऊन येतात. यानंतर बिब्बा फळ, गोडांबीची विक्री करतात. गोडांबीला ६००/७०० रुपये भाव मिळतो. परिसरात, महापालिकेनेही बागांत हा वृक्ष लावला तर गोडांबीबरोबर बिब्बा बी मिळेल. रोजगार मिळवून देणारे हे झाड आहे.

बिब्बा उपयुक्त फळ

कर्करोगात फळांचा रस फायदेशीर

फळांचा वापर अस्थमा, कफ, मेंदूविकार, फीट

सांधेदुखी, घशाचे विकार, कुष्ठरोग, मूळव्याध विकारात उपयुक्त.