कोल्हापूर : गामविकासमंत्री हसन मुश्रीफ यांनी भारतीय जनता पार्टीचे प्रदेशाध्यक्ष आमदार चंद्रकांत पाटील यांच्यावर टीका करणे, त्यांच्यासारख्या राम भक्ताला शोभत नाही, श्री. पाटील हे पन्नास वर्षांहून अधिक समाज कार्यात आहेत. वैयक्तिक आयुष्य बाजूला ठेवून एक तपाहून अधिक काळ त्यांनी समाजासाठी देशभरात काम केल्यामुळे त्यांचा अभ्यास मोठा आहे. भारतीय जनता पार्टीचे प्रदेशाध्यक्ष म्हणून ते बोलतात, विरोधी नेत्यांच्या चुकीच्या धोरणावर बोलणे हा राजकीय प्रघात आहे आणि त्यांनी तशी टीका केली. ती टीका झोंबलेली दिसते, असे पत्रक भाजपाचे महेश जाधव, राहूल चिकोडे, अशोक देसाई, विजय जाधव, दिलीप मित्राणी, हेमंत आराध्ये, गणेश देसाई यांनी प्रसिद्धीस दिले आहे.

एका तालुक्याचा मतदारसंघ सोडून तुम्ही शहरातून निवडणूक लढवू शकत असता तर तुमची दादांवरील टीका योग्य असू शकली असती. परंतु तुम्ही तसे करू शकत नाही. एकाच मतदारसंघात राहिल्यामुळे जिल्ह्याबाहेर तुमची ओळख कमी आहे. पक्षातही एक अनुयायी इतकीच तुमची ओळख. पद मिळवतानाही आपल्या गुरूचा विश्वासघात करून मिळविले हे जनता जाणते. "अहमदनगरचे पालकमंत्री दाखवा आणि बक्षीस मिळवा" असे बोर्ड तुम्ही पालकमंत्री असलेल्या अहमदनगरमध्ये लागल्याचे जनतेने पाहिले आहे.

कोरोना परिस्थितीत तुम्ही पालकमंत्री असलेल्या अहमदनगरला जायचे सोडून कोल्हापूरच्या पालकमंत्र्यांच्या कामात तुम्हाला ढवळाढवळ करतानाही जनतेने पाहिले आहे. "कोरोनाच्या पहिल्या लाटेत शेतकऱ्यांचे डोळे पांढरे होतील, असे पॅकेज महाविकास आघाडी सरकार देईल" अशी घोषणा आपण केली होती. नुकत्याच राज्य शासनाने जाहीर केलेल्या फसव्या पॅकेजमुळे आपले डोळे पांढरे झाले असावेत आणि म्हणूनच इतरांचे मानसिक संतुलन बिघडल्याचे तुम्हाला भासत असावे.