कोल्हापूर : काँग्रेस नेते राहुल गांधी (Congress leader Rahul Gandhi) यांच्या दौऱ्याच्या पार्श्वभूमीवर भाजप आक्रमक झाली आहे. राहुल गांधी यांच्या कोल्हापूर दौऱ्याला भाजपचा (BJP) तीव्र विरोध होताना दिसत आहे.

काही दिवसांपूर्वी आरक्षणासंदर्भात चुकीचं वक्तव्य करणाऱ्या राहुल गांधींना भाजपकडून काळे झेंडे दाखवण्याचा प्रयत्न होत आहे. गांधी येण्यापूर्वीच भाजप कार्यकर्त्यांना पोलिसांकडून घेराव सुरु आहे.

भाजप कार्यालयातच कार्यकर्त्यांना पोलिसांनी घेरलं असून भाजपचे कार्यकर्ते आणि पोलिसांमध्ये झटापट सुरु आहे. भाजपचे कार्यकर्ते गेट तोडून आंदोलन करण्यासाठी मुख्य रस्त्याकडे जाताना दिसत आहेत. मात्र, पोलिसांनी वाटेतच अडवल्याने भाजप कार्यकर्त्यांनी रस्त्यावर ठिय्या मांडला आहे.

भाजप कार्यकर्त्यांकडून राहुल गांधी यांच्या विरोधात तीव्र घोषणाबाजी केली जात आहे. सध्या राहुल गांधी हे उचगाव येथील कार्यकर्त्यांच्या घरी आहेत. कोल्हापुरात पोहोचताच त्यांनी उचगावमधील काँग्रेस कार्यकर्त्याची भेट घेतलीये. त्यांनी अचानक भेट दिल्याने कार्यकर्त्यांमध्ये उत्साह असून पोलिसांची मात्र तारांबळ उडाली आहे.

राहुल गांधी का आलेत कोल्हापूरला?

लोकसभेतील विरोधी पक्षनेते राहुल गांधी आज कोल्हापूर शहराच्या दौऱ्यावर आले आहेत. त्यांच्या उपस्थितीत विविध कार्यक्रम होणार आहेत. गांधी कालच दिल्लीतून कोल्हापुरात येणार होते. मात्र, विमानात झालेल्या तांत्रिक बिघाडामुळे त्यांना दौरा रद्द करावा लागला होता. आज कसबा बावडा येथे उभारलेल्या छत्रपती शिवाजी महाराज यांच्या पुतळ्याचे त्यांच्या हस्ते अनावरण होणार आहे.