नागाव (कोल्हापूर) : शिरोली औद्योगिक वसाहतीमधील एका फाउंड्री उद्योगात फर्नेस भट्टीचा स्फोट होऊन जखमी झालेल्या कामगाराचा आज सकाळी उपचार सुरू असताना सीपीआर येथे मृत्यू झाला. प्रकाश दिनकर पोद्दार (वय २५, रा. जोशी नगर, संभाजी नगर, कोल्हापूर) असे मृताचे नाव आहे. 

याबाबत घटनास्थळी व पोलिसांतून मिळालेली माहिती अशी : रविवारी (ता. १७) वसाहतीमधील एका फाउंड्री उद्योगातील फर्नेस भट्टीचा अचानक ब्लास्ट झाला. यामुळे भट्टीतील लावारस उद्योगाच्या क्षेत्रात इतरत्र पसरला. यातीलच काही लावारस प्रकाश पोतदार या कामगारांच्या अंगावर पडल्याने ते गंभीर जखमी झाले होते. उपचारासाठी त्यांना कोल्हापुरातील खाजगी दवाखान्यात दाखल करण्यात आले. आज उपचार सुरू असताना त्यांचा मृत्यू झाला. मृतदेह शवविच्छेदनासाठी सीपीआर येथे नेण्यात आला होता. मात्र याबाबत कोणताही पंचनामा न झाल्याने नातेवाईकांनी मृतदेह ताब्यात घेण्यास विरोध करत आंदोलन केले. शिरोली एमआयडीसी पोलिस ठाण्यात याबाबत नोंद झाली आहे.

हेही वाचा - शेती क्षेत्रात आपली वेगळी छाप उमटावी म्हणून अक्षय शेतात नव-नवे प्रयोग करत आहे 

संपादन - स्नेहल कदम