चंदगड : चंदगड व आजरा तालुक्‍यात गेले दोन दिवस बीएसएनलच्या सेवेचा खेळखंडोबा सुरू आहे. इंटरनेट सेवा पूर्णतः कोलमडली असून संवाद सुरळीत होत नाहीत. दर एक मिनिटीला सेवा सुरळीत होणे आणि लगेचच खंडीत होणे असे प्रकार होत असल्याने ग्राहकातून तीव्र नाराजीचा सूूर आहे. कंपनीने त्वरीत सेवा सुरळीत करावी अशी मागणी आहे. 

गुरुवारी (ता. 19) दुपारी साडे बारा वाजल्यापासून सेवा खंडीत होण्याचा प्रकार सुरु झाला. त्या दिवशी सायंकाळी चारच्या सुमारास सेवा सुरु झाली. त्यानंतर पुन्हा साडे पाच वाजता खंडीत झालेली सेवा दुसऱ्या दिवशी सकाळी अकरा वाजता सुरू झाली. परंतु त्यात नियमितता नव्हती. दर मिनिटीला सेवा खंडीत होण्याचा प्रकार सुरू होता. इंटरनेट सेवा, तर दिवसभर बंदच राहिली. यामुळे परगावातील व्यक्तीशी संपर्क साधणे अवघड झाले.

नोकरी, व्यवसायाच्या निमित्ताने संपर्कावर मर्यादा आल्या. अलिकडच्या काळात बीएसएनएलची सेवा चांगली म्हणून हजारो ग्राहकांनी अन्य कंपनीचे मोबाईल क्रमांक बीएसएनएलमध्ये रूपांतरीत केले होते. परंतु गेल्या दोन दिवसापासून कंपनीकडून सेवेचा जो खेळखंडोबा सुरू आहे त्यामुळे ग्राहक वैतागले आहेत. बहुतांश ग्राहकांनी प्रिपेड सेवा स्विकारलेली आहे. कंपनीने त्यांना खंडीत सेवेचा कालावधी भरून द्यावा, तसेच त्वरीत सेवा सुरळीत करावी, अशी मागणी आहे.