कोल्हापूर : सरकारमधील एका मंत्र्याला भ्रष्टाचारावरून अटक झाली. एका मंत्र्याच्या नातेवाईकांकडे १२०० कोटीची मालमत्ता मिळाली. अमली पदार्थांच्या बाबतीत एका मंत्र्याच्या नातेवाईकावर कारवाई झाली. तर एका मंत्र्याच्या जावयाचे १५०० कोटीचे कंत्राट रद्द झाले. आतातरी मुख्यमंत्र्यांनी नैतिकतेला धरून आपला राजीनामा दिला देऊन मध्यावधी निवडणुकीला सामोरे गेले पाहिजे, अशी मागणी भारतीय जनता पक्षाचे प्रदेशाध्यक्ष आमदार चंद्रकांत पाटील यांनी आज पत्रकार परिषदेत केली.

यावेळी चंद्रकांत पाटील म्हणाले, 'सर्व कायदेशीर पर्याय संपल्याने माजी गृहमंत्री अनिल देशमुख यांना तपास यंत्रणांना सामोरे जावे लागले. मध्यरात्री त्यांना अटक झाली. आता असा कोणताही गुन्हा उरला नाही ज्याचा आरोप महाविकास आघाडी सरकारमधील मंत्र्यावर नाही. राजकारणातील नैतिकता महाविकास आघाडीने धुळीस मिळवली आहे. राज्यातील कायदा सुव्यवस्था धोक्यात आहे. या सर्व गोष्टी पाहता मुख्यमंत्री उद्धव ठाकरे यांनी नैतिकतेला धरून राजीनामा देऊन मध्यावधी निवडणुकांना सामोरे गेले पाहिजे. राज्याने आपले कर कमी केले तर पेट्रोल, डिझेल दर कमी होईल. पण अजित पवार इंधनाच्या करातून मिळणारा आयता पैसा सोडायला तयार नाहीत.'