सध्या कोल्हापूर जिल्ह्यात कोल्हापूर उत्तरच्या निवडणुकीची रणधुमाळी सुरु आहे. भाजप आणि महाविकास आघाडी यांच्यात जोरदार मोर्चेबांधणी सुरु आहे. दरम्यान, काल भाजपाच्या चित्रा वाघ या भाजप उमेदवार सत्यजित कदम यांच्या प्रचारासाठी कोल्हापूरमध्ये आल्या असता त्यांच्या सभेवर दगडफेक झाल्याचा आरोप त्यांनी केला आहे. सभा सुरु असताना काहीजणांनी त्यांच्या दगडफेक केली असंही त्या म्हणाल्या आहेत. शहरातील मुक्त सैनिक वसाहत येथील जाहीर सभेत हा प्रकार घडला असल्याचे समोर आले आहे. याप्रकरणी रीतसर फिर्याद नोंदवणार असल्याचेही त्यांनी सांगितले आहे.

यासंदर्भात चित्रा वाघ यांनी एक ट्विट केलं आहे. यात त्या म्हणतात, वाह रे बहाद्दरांनो, समोर यायची हिंमत नाही तर सभेत दगडं मारता. आज संध्याकाळी भाजपा उत्तर कोल्हापूर उमेदवार सत्यजित कदम यांच्या प्रचारार्थ सभेत मी बोलत असतांना तिथे दगडं मारण्यात आली. तुमची दहशत गुंड बलात्काऱ्यांवर दाखवा असल्या थेरांना घाबरणारी चित्रा वाघ नाही हे लक्षातचं ठेवा, असं वाघ यांनी खडासावून सांगितलं आहे.

दरम्यान, कोल्हापूर उत्तर विधानसभा मतदारसंघाच्या पोटनिवडणूक प्रचारासाठी भाजप नेत्या चित्रा वाघ कोल्हापुरात आल्या आहेत. शहरातील मुक्त सैनिक वसाहत आणि राजारामपुरी येथे त्यांची जाहीर सभा होती. मात्र यावेळी सभेवर काहीजणांनी दगडफेक केली असल्याचा आरोप त्यांनी केला आहे.