कोल्हापूर- मुख्यमंत्री उद्धव ठाकरे आणि माजी मुख्यमंत्री देवेंद्र फडणवीस कोल्हापूरमध्ये पुरग्रस्त भागाची पाहणी करत आहेत. यावेळी आजी-माजी मुख्यमंत्री शाहुपुरीत आमनेसामने आल्याचं दृश्य पाहायला मिळालं होतं. ठाकरे-फडणवीस यांच्यामध्ये काही मिनिटे चर्चाही झाली होती. त्यांच्या या अनपेक्षित भेटीमुऴे अनेकांच्या भुवया उंचावल्या होत्या, शिवाय दोघांमध्ये काय बोलणं झालं याबाबत उत्सुकता लागली होती. दुष्काळग्रस्त भागाचा दौरा केल्यानंतर पत्रकार परिषद घेत मुख्यमंत्र्यांनी याबाबत खुलासा केला आहे. (cm uddhav thackeray meet bjp devendra fadanvis in shahupur politics)

देवेंद्र फडणवीस शाहुपुरीत असल्याचं कळालं, त्यामुळे त्यांना फोन केला आणि थांबा म्हटलं. आम्हाला लोकांच्या जीवाशी खेळ करायचा नाही. त्यांच्याकडून काही चांगल्या सूचना आल्यास स्वागत आहे. आम्ही दरवाजा आड बोललो नाही, खुलेआम बोललो. कायमस्वरुपी मार्ग काढायचा आहे. विरोधकांच्या सुचनेचेही स्वागत आहे. सर्वांचे एकमत होणे आवश्यक आहे. महाराष्ट्रातील प्रमुख पक्ष एकत्र आल्यानंतर जे होईल त्यात कोणी आड येणार नाही, असं मुख्यमंत्री उद्धव ठाकरे म्हणाले.

उद्धव ठाकरे पत्रकार परिषदेत म्हणाले की, 'सर्वात महत्त्वाचे म्हणजे पूरबाधित क्षेत्रातील तसेच दरडी कोसळण्याचा धोका असलेल्या वस्त्यांचेही चांगल्या पद्धतीने पुनर्वसन करण्यावर आमचा भर आहे. हे साध्य करण्यासाठी कठोर निर्णय घ्यावे लागतील. नदीपात्रातली अतीक्रमणे, बांधकामांना परवानगी न देण्याच्या सूचना मी दिल्या आहेत. या पुराचं भीषण वास्तव जवळून पाहिल्यानंतर त्यासंदर्भातील कामाला, आराखड्याला गती दिल्याशिवाय मी स्वस्थ बसणार नाही'