कोल्हापूर : शिक्षकांच्या स्वॅब टेस्ट झालेल्या नाहीत. पालकांची संमतिपत्रे जमा नाहीत. त्यामुळे शाळा सुरू करायची की नाही, असा संभ्रम शिक्षक आणि शाळा व्यवस्थापनात आहे. पालकांना अद्यापही कोरोनाची भीती कायम असून, उद्या (ता. २३) शाळा सुरू होणार का, हा प्रश्न अनुत्तरितच आहे. शिक्षकांच्या स्वॅब टेस्टसाठी ७ डिसेंबरपर्यंत मुदतवाढ दिलेली आहे. 

कोरोनामुळे यंदा शैक्षणिक वर्ष दिवाळी झाली तरीही सुरू झाले नाही. राज्य सरकारने उद्यापासून नववी आणि दहावी वर्ग सुरू करण्याचा निर्णय घेतला होता; पण मुंबईतील शाळांनी त्याला विरोध केला. अखेर शाळा सुरू करण्याचा निर्णय स्थानिक प्रशासनाने घ्यावा, असा निर्णय झाला. मात्र, जिल्ह्यात प्रशासनाने अद्याप कोणताही ठोस निर्णय घेतलेला नाही. शिक्षकांच्या स्वॅब टेस्ट अजून अपूर्ण आहेत.

हे पण वाचा -  कोल्हापूरच्या वीरपुत्राला अखेरचा निरोप; 8 वर्षांच्या चिमुकल्याने दिला भडाग्नी

बहुतांश शाळांनी पालकांना संमतीपत्रांसंदर्भात कल्पना दिलेली नाही. त्यामुळे संमतीपत्रेही जमा झालेली नाहीत. अशा सर्व गोंधळात आज शाळा सुरू होणार की नाही, याबाबत कोणतीही ठोस माहिती प्रशासनाकडून देण्यात आलेली नाही. ज्या शाळांची सर्व तयारी झालेली आहे, शिक्षकांच्या टेस्ट पूर्ण आहेत, संमतीपत्र जमा झालेले आहेत, त्यांनी शाळा सुरू करण्यास हरकत नाही, असे स्थानिक प्रशासनाने सांगितले. या सर्व पार्श्‍वभूमीवर शाळा नेमक्‍या कधी सुरू होणार, याबाबत पालक, विद्यार्थी आणि शिक्षक यांच्यात संभ्रम आहे.

हे पण वाचा - तोतया पोलिसांचा दोघा वृद्धांना गंडा ; दोघे भामटे सीसीटीव्हीत कैद 

प्रमुख अडचणी
  शिक्षकांच्या स्वॅब टेस्ट अद्याप अपूर्ण
  सर्व पालकांची संमतिपत्रे जमा नाहीत
  शाळांचे निर्जंतुकीकरण सुरू आहे
  स्थानिक प्रशासनाचा ठोस निर्णय नाही
नाशिकमधील शाळा 
४ जानेवारीपर्यंत बंद

 संपादन - धनाजी सुर्वे