कोल्हापूर : लोकसभेतील विरोधी पक्षनेते, काँग्रेस खासदार राहुल गांधी (Rahul Gandhi) आज कोल्हापूर दौऱ्यावर आले आहेत. दरम्यान, कोल्हापुरातील कसबा बावड्यामधील भगवा चौकात छत्रपती शिवाजी महाराज यांच्या पुतळ्याचे (Chhatrapati Shivaji Maharaj Statue) त्यांच्या हस्ते नुकतेच अनावरण झाले.

तत्पूर्वी, आज सकाळी राहुल गांधी कोल्हापूर विमानतळावर (Kolhapur Airport) दाखल झाले. यावेळी काँग्रेस प्रदेशाध्यक्ष नाना पटोले, आमदार सतेज पाटील यांच्यासह इतर नेत्यांनी त्यांचं जंगी स्वागत केलं. त्यानंतर राहुल गांधी कुठल्याही हॉटेलला न जाता त्यांनी थेट उचगावमधील एक कौलारू घर गाठलं.

राहुल गांधींनी थेट कौलारू घर गाठलं

तिथं राहुल गांधींनी घरगुती जेवणाचा आस्वाद घेत पुढं नियोजित कार्यक्रमस्थळी दाखल झाले. त्यांच्या या साध्या राहणीमानाचं कौतुक होतं आहे. उचगाव येथील डॉ. बाबासाहेब आंबेडकर चौकातील अजित तुकाराम संधे (Ajit Tukaram Sandhe) यांच्या घरी राहुल गांधी यांनी भेट दिली. याठिकाणी जवळपास अर्धा तास राहुल गांधींनी संधे कुटुंबाशी संवाद साधला. त्यानंतर त्यांनी कुटुंबाकडे संविधानाची प्रत सुपुर्द केली.

संधे कुटुंबाकडून राहुल गांधींचा पाहुणाचार

संधे कुटुंबानंही राहुल गांधींचा पाहुणाचार करत त्यांना घरीच नाश्ता बनवून खायला दिला. अजित संधे टेम्पोचालक आहेत. त्यांचं सर्वसामान्य गरीब कुटुंब आहे जे उचगावात राहतात. या भेटीनंतर काँग्रेस आमदार विश्वजित कदम म्हणाले, गांधी कुटुंबाचा डीएनए गोरगरिब कुटुंबासोबत राहणं, सर्वसामान्य लोकांत मिसळणं, त्यांच्या सुखदुख:त सहभागी होणं हे आहे. गांधी कुटुंबाची ही परंपरा राहुल गांधी जोपासताना दिसत आहेत. कोल्हापूर शहरातील अत्यंत गरीब कुटुंबातील लोकांशी संवाद साधत त्यांचं जीवनमान समजून घेण्यासाठी आले होते ही फार मोठी कौतुकाची गोष्ट आहे, असं ते म्हणाले. राहुल गांधींनी गरीब कुटुंबाची भेट घेतल्याने त्यांचं सर्वत्र कौतुक होत आहे.