गडहिंग्लज : सात दिवसांपूर्वी तो पत्नी व मुलीसह मुंबईहून आला. त्याने थेट शेंद्री येथे स्वॅब दिला. त्यानंतर त्याला शाळेत ठेवले. सात दिवसांनंतर कालच (शुक्रवार) घरी क्वारंटाईन केले. आज पहाटे त्याचा रिपोर्ट पॉझिटिव्ह आला. मुंबई ते कळवीकट्टे व्हाया शेंद्री असा त्या बाधित तरुणाचा प्रवास लोकांना चिंतेत टाकणारा ठरला आहे.

कोल्हापुरच्या बातम्या वाचण्यासाठी येथे क्लिक करा

तेरणी व बुगडीकट्टेपासून हाकेच्या अंतरावर आणि कर्नाटकातील हत्तरकीला खेटून असलेले कळवीकट्टे गाव. हा तरुण ३५ वर्षांचा आहे. तो, पत्नी व मुलगी आणि त्याच्यासोबत मित्राची तिघांची फॅमिली, अशा सहा जणांनी मुंबईतून प्रवास सुरू केला. १० मे रोजी ते थेट शेंद्री माळावरील वसतिगृहात तपासणीसाठी पोचले. तेथे स्वॅब घेतला. शेंद्रीतील विलगीकरण केंद्रात जागा नसल्याने त्यांना गावी पाठवून त्यांना शाळेत ठेवण्यास सांगितले. रिपोर्ट अजून आले नाहीत, तरीसुद्धा शाळा फुल्ल झाल्याने सात दिवसांच्या क्वारंटाईननंतर कालच घरी सोडले. तरुणाचे हत्तरकी रोडवर स्वतंत्र घर असल्याने तो कुटुंबासह तेथेच राहिला. आज सकाळी त्याचा रिपोर्ट पॉझिटिव्ह आला अन्‌ गावाला धक्काच बसला. आज सकाळपासूनच त्याच्याशी कितीजण संपर्कात आले, याची माहिती घेणे सुरू होते. कळवीकट्टेच्या रूपाने तालुक्‍यात पहिलाच रुग्ण आढळल्याने प्रशासन सतर्क झाले आहे. लोकांनी बाहेर पडू नये, अशा सूचना दिल्या आहेत.

हे पण वाचा - ‘त्या’कुटुंबावर आभाळच कोसळले ;अन् सहानुभूतीने पाणावले आख्या गावाचे डोळे
 

शेजारधर्म पाळला...
हत्तरकी रोडवर या उच्चशिक्षित तरुणाचे घर आहे; परंतु, थोड्या अंतरावर काही घरे आहेत. त्यांनी जर शेजारधर्म पाळून त्यांच्याशी संपर्क केला असेल तर ते धोकादायक ठरू शकते. त्यांना जेवण अथवा अन्य मदतीसाठी नातेवाईक, मित्रमंडळी कोणी गेले होते का, याचीही विचारपूस सुरू आहे. 

हे पण वाचा - सावधान : होम क्वारंटाईन शिक्क्यामुळे हाताला फोड

त्याचा प्रवास नजरेत
१० मे रोजी आलेला हा तरुण शेंद्रीतून स्वॅब देऊन बाहेर पडल्यानंतर गावी जाईपर्यंत आणखी कोठे फिरला होता का, कळवीकट्टेत गेल्यानंतर तेथे कोणाशी संपर्क केला का? क्वारंटाईन झाल्यानंतर तो कुठे बाहेर पडला होता का?, मुंबईवरून येताना तपासणी नाक्‍यावर थेट संपर्क कोणाशी आला का? हे सर्व नजरेत आणण्यासाठी प्रशासन धडपडत आहे.