कुडची (बेळगाव) - रायबाग तालुक्यातील कृष्णा काठावरील समृद्ध गाव. पण कोरोनामुळे ते 'ब्लॅक लिस्ट'मध्ये गेले. मात्र सर्वसामान्य नागरिक व अधिकाऱ्यांनी हे युद्ध जिंकण्याचाच विडा उचलला. यशस्वी झुंज देत कुडची जिंकली आणि कोरोना हरला आहे. येथील सर्वच्या सर्व २५ रुग्ण कोरोनामुक्त होऊन घरी परतले आहेत. त्यामुळे नागरिक व अधिकाऱ्यांच्या आदर्शवत शिस्त, समन्वय व चिकाटीचे सर्वत्र कौतूक होत आहे.

कोरोनाने डोके वर काढल्याच्या ५ एप्रिल या पहिल्या  दिवसापासून कुडची भीतीच्या छायेखाली होती. पहिल्याच दिवशी निजामुद्दीन येथील मरजकहून परतल्यावर क्वारंटाइन केलेल्या पैकी चार रुग्ण आढळल्याने खळबळ उडाली. मात्र प्रशासन, पोलिस, आरोग्य खाते व नगर परिषदेच्या अधिकाऱ्यांनी मनापासून कंबर कसली.  गुजरात, दिल्ली कनेक्शनपर्यंत पोहोचून वाढता वाढता रुग्णांचा आकडा २ जूनपर्यंत तब्बल २५ वर जाऊन पोहोचला.

वाचा - 'ते' मरण पावल्याचे दोन दिवसानंतर कळले अन्...

कोरोनाला पळवून लावण्यासाठी जिल्हाधिकारी डॉ. एस. बी. बोमनहळ्ळी, जिल्हा पंचायतीचे मुख्य कार्यकारी अधिकारी डॉ. राजेंद्र के. व्ही., जिल्हा पोलिस प्रमुख लक्ष्मण निंबर्गी, प्रांताधिकारी रवींद्र कर्लिंगन्नावर, तहसीलदार चंद्रकांत बजंत्री, अथणीचे पोलिस उपाधीक्षक एस. व्ही. गिरीश, तालुका आरोग्य अधिकारी डॉ. एस. एस. बाणे, कुडची पोलिस ठाण्याचे उपनिरीक्षक शिवराज दरीगौड, कुडची नगर परिषदेचे मुख्याधिकारी एस. ए. महाजन, कुडचीचे आरोग्य अधिकारी डॉ. सतीश कलट्टी यांनी अनेकदा प्रसंगी कठोर निर्णय घेत घेतले. या अधिकाऱ्यांनी तळ सोडलाच नाही. तरीही चिकटून बसलेला कोरोना माघार घ्यायला तयार नव्हता. मात्र नागरिकांनी शहर लॉकडाउन, प्रत्येक गल्ली सील, क्वारंटाइन होण्यासाठी सहकार्य, आरोग्य खात्याकडून रोज तपासणी, नेटका पोलिस बंदोबस्त, अधिकाऱ्यांनी नागरिकांशी समन्वयाने वागून अत्यावश्यक घरपोच सेवा व नियम आणि अटींचे पालन करून अधिकाऱ्यांच्या आवाहनाला प्रतिसाद दिला. त्यामुळे अखेर सोमवारी (ता. ८) कोरोना रुग्णांची साखळी 'ब्रेक' करण्यात यश मिळाले. त्यामुळे अधिकाऱ्यांसह सर्वसामान्यांनी सुटकेचा नि:श्वास सोडला आहे. मात्र अद्याप गाफील राहून चालणार नाही. सोशल डिस्टन्स पाळत मास्क, सनिटायझर वापरून प्रत्येकाने आपल्या आरोग्याची काळजी घेण्याची आवश्यकता आहे.

एक नजर...

• ५ एप्रिल रोजी आढळले पहिले चार रुग्ण.
• २१ एप्रिल रोजी पहिल्या रुग्णाला डिस्चार्ज
• कुडची येथील रुग्णांचा आकडा पोहोचला २५ वर.
• २ जूनला आढळले शेवटचे दोन रुग्ण.
• ८ जूनला शेवटचा रुग्ण घरी पोहोचल्याने कुडची कोरोनामुक्त.

यापेक्षा वेगळे समाधान ते काय असणार?

येथील अधिकारी व नागरिकांनी कोरोनाला दिलेली टक्कर 'कुडची पॅटर्न' म्हणून फलरुपाला आली आहे. महाराष्ट्र, बिहार, राजस्थान व अन्य राज्यातील कोरोनाचा प्रसार रोखण्यास हा पॅटर्न उपयुक्त ठरत आहे. कुडचीवासियांच्यादृष्टीने यापेक्षा वेगळे समाधान ते काय असणार? पण जेंव्हा-जेंव्हा आपत्ती येईल, तेंव्हा-तेंव्हा कुडचीचे नाव घेतले जाईल, एवढे मात्र निश्चित!
 

'कुडची कोरोनामुक्त करण्यात अधिकाऱ्यांसह सर्वसामान्यांचे सहकार्य यांचा सिंहाचा वाटा आहे. शहराने एका कटू अनुभवाला सामोरे जात मोठे युद्ध जिंकल्याने प्रत्येक नागरिकाला समाधान वाटत आहे.'
- सादीक सजन,
नगरसेवक, कुडची
 

'शासनाच्या विविध खात्यातील वरिष्ठ अधिकाऱ्यांचे मार्गदर्शन व नागरिकांच्या सहकार्यामुळे कुडची कोरोनामुक्त झाली आहे. पण अजूनही बेफिकीर होऊन चालणार नाही. प्रत्येक नागरिकांने सतत खबरदारी घेण्याची आवश्यकता आहे.'
- एस. ए. महाजन,
मुख्याधिकारी, कुडची नगर परिषद