इचलकरंजी (कोल्हापूर) : येथील काळ्या ओढ्यालगत गांजा पार्टी करणाऱ्या सहा उच्चशिक्षित युवकांवर पोलिस उपअधीक्षक पथकाने कारवाई केली. त्यांच्याकडून गांज्याची पाकिटे, मोटारसायकल, मोबाईल असा सुमारे 2 लाख 62 हजार रुपयांचा मुद्देमाल जप्त केला.

गौरव विजय मंडल (वय 22 रा. पुजारी मळा, इचलकरंजी), आशुतोष चंद्रकांत लायकर (लायकर गल्ली, इचलकरंजी), दिनेश श्रीकांत पिसे (पुजारी मळा, इचलकरंजी), अभिषेक संपत डुबल (रसना कॉर्नर), रोहन जगदीश बांगड (नाईट कॉलेज जवळ, इचलकरंजी), वर्धमान पायगोंडा टारे (स्टेशन रोड, इचलकरंजी) अशी त्यांची नावे आहेत. सहा जणांविरोधात गावभाग पोलिसांत गुन्हा नोंद झाला आहे. 

हेही वाचा - भावाला केलेला नंतरचा कॉल उचलला डॉक्टरांनी ; जिगरी दोस्तांची ती सफर ठरली शेवटची 

आज दुपारच्या सुमारास काळ्याओढ्याच्या बाजूला असणाऱ्या शेतामध्ये गांजाची पार्टी सुरू असलेली माहिती पोलिस उपअधीक्षक पथकाला समजली. पथकाने छापा टाकला असता सहा युवक गांजाची नशा करत असलेले आढळले. गांज्यासह त्यांना ताब्यात घेतले. त्यांच्याकडून 30 ग्रॅम गांजासह, चार मोटारसायकल, सहा मोबाईल असा सुमारे 2 लाख 62 हजार रुपयांचा मुद्देमाल जप्त केला आहे.

चौकशी केली असता इंडस्ट्रियल इस्टेट व जयभीम नगर झोपडपट्टी येथून गांजा आणल्याची माहिती समोर आली; मात्र या दोन्ही ठिकाणाहून पोलिसांना विक्रीसाठी आणलेला गांजा मिळून आला नाही. ही कारवाई सुनील पाटील, सागर हारगुले, संतोष साळुंखे, जावेद आंबेकरी, सद्दाम शेख यांनी केली.

संपादन - स्नेहल कदम