इचलकरंजी : सांगली नाका मार्गावर एका पादचारी महिलेला दुचाकीस्वाराने ठोकरल्याने ती जागीच ठार झाली. कांचन नामदेव आळंदे (वय 55 रा.आर.के. नगर शहापुर ) असे तिचे नाव आहे. याप्रकरणी शिवशंकर चन्नय्या हिरेमठ (वय 54 रा. यड्राव) याच्यावर शहापूर पोलिसांत गुन्हा दाखल झाला आहे. हा अपघात बुधवारी सायंकाळच्या सुमारास सांगली नाका मार्गावरील महाराष्ट्र बँकेच्या एटीएमसमोर घडला.

पोलिसांतून मिळालेली माहिती अशी, शिवशंकर हिरेमठ हे मोटरसायकलवरून (एमएच 09 एफ.एस.5331) यड्राव फाट्यावरून सांगली नाक्याकडे जाते होते. बँक ऑफ महाराष्ट्रच्या ए.टी.एम समोर आल्यानंतर भरधाव वेगाने हिरेमठ यांच्या मोटारसायकलने पायी चालत निघालेल्या कांचन आळंदे जोरात ठोकरले. यावेळी कांचन या रस्त्यावर कोसळल्या. डोक्यात जबर मार बसला. त्वरित त्यांना उपचारासाठी आयजीएम रुग्णालयात दाखल करण्यात आले. मात्र कांचन आळंदे यांचा उपचारापूर्वीच मृत्यू झाला. पोलिस पाटील दुचाकीस्वार जगदिश भुपाल संकपाळ यांच्या फिर्यादीनुसार दुचाकीस्वार शिवशंकर हिरेमठ याच्यावर शहापूर पोलिसांनी गुन्हा दाखल केला आहे. अपघातातील मोटारसायकल पोलिसांनी ताब्यात घेतली आहे.