कुरुंदवाड : मजरेवाडी (ता. शिरोळ) येथील सावकार कल्लाप्पा देबाजे याच्या खून प्रकरणी पोलिसांनी चिक्कोडी तालुक्यातील देवर्षीला आज अटक केली. पोलिसांनी या प्रकरणाचा २४ तासांत छडा लावत संशयित माळाप्पा कर्याप्पा हेग्गण्णावार (वय २५, रा. नागराळे, ता. चिक्कोडी) याला जेरबंद केले.

त्याने खुनाची कबुली दिली आहे, अशी माहिती सहायक पोलिस निरीक्षक बालाजी भांगे यांनी आज दिली. देबाजे हा संशयित माळाप्पा याच्या पत्नीकडे वाईट नजरेतून पाहत होता आणि वारंवार मानसिक त्रास देत होता. त्यामुळे खून झाल्याची माहितीही भांगे यांनी दिली.

याबाबत पोलिसांनी दिलेली माहिती अशी ः संशयित माळाप्पा देव सांगण्याचे काम करतो. तो देबाजे याला होत असलेल्या त्रासाबद्दल विचारणा करण्यासाठी जात होता. संशयित माळाप्पा याच्या पत्नीकडे देबाजे वाईट नजरेने पाहून त्रास देत होता. पत्नीने हा प्रकार पतीला सांगितला. त्यानंतर माळाप्पा याने देबाजेला आठ दिवसांपूर्वी समजावून सांगितले होते. मात्र, या गोष्टीचा राग माळाप्पा याच्या मनात होता.

सोमवारी (ता. १७) दुपारी दीडच्या सुमारास माळाप्पाने देबाजेला तुझा होणारा त्रास कमी करण्यासाठी उतारा करावा लागेल, असे सांगून अगरबत्ती अन् लिंबू घेऊन मजरेवाडी ते कुरुंदवाड जाणाऱ्या रस्त्यावरील एका महाविद्यालयाच्या मागे बोलावून घेतले. लिंबू उतरविण्याचा बहाण्याने देबाजेला काटेरी झुडपात नेऊन दोरीने त्याचे हात-पाय बांधले. माळाप्पाने कुऱ्हाडीने देबाजेच्या गळ्यावर वार करून त्याचा खून केला.

दरम्यान, माळाप्पा याच्या संपर्कातील आणखी दोघांना कुरुंदवाड पोलिसांनी ताब्यात घेतले आहे. कुरुंदवाड पोलिस व स्थानिक गुन्हे अन्वेषण विभागाने कारवाई केली. सहायक पोलिस निरीक्षक बालाजी भांगे तपास करीत आहेत.