कोल्हापूर - लॉकडाऊनच्या काळात मद्याची व बिअर बार फोडणाऱ्या टोळीचा छडा लावण्यात करवीर पोलिसांना यश मिळाले. याप्रकरणी तिघांना अटक करून त्यांच्याकडून तीन गुन्ह्यांची उकल करण्यात आली आहे. अटक केलेल्या एका संशयितांने कोरोना झाल्याचा तर दुसऱ्याने आजारपणाचा बहाणा केल्याने पोलिसांची चांगलीच तारांबळ उडाली. पण सीपीआरमधील कोरोना कक्षात नेल्यानंतर संशयिताचा आजार अपोआप बरा झाला.

अटक केलेल्या संशयितांची नावे - अविनाश शांताराम कोकाटे (वय 22, रा. एसएसबी बोर्ड, मोहीतेनगर), सतिश धरमा बाटुंगे (वय 23, रा. जयसिंगपूर, सध्या रा. मोहितेनगर) आणि मोहित मोतीलाल मिनेकर (वय 22, रा. पाचगाव) अशी त्यांची नावे आहेत.

पाच दिवस चालून 'तो' गावाजवळ आला, आणि काय घडले वाचा

याबाबत पोलिसांनी दिलेली माहिती, साबळेवाडी (ता. करवीर) येथील दर्शन बार, त्यापाठोपाठ पाचशे मीटर अंतरावरील श्री बिअर शॉपी 21 एप्रिलला फोडला. हातकणंगले येथील सम्राट बार चोरट्यानी फोडण्याचा प्रकार घडला होता. याचा तपास करवीर पोलिस ठाण्याचे प्रशिक्षणार्थी आयपीएस अधिकारी अविनाश कुमार, पोलिस निरीक्षक सुनील पाटील करत होते. गुन्हे शोध पथकाला पाचगाव येथे संशयित मोहित लॉकडाऊनच्या काळात मद्याची विक्री करत असल्याची माहिती पोलिसांना मिळाली. त्यांनी त्याच्यासह त्याचे साथिदार संशयित अविनाश कोकाटे, सतिश बाटुंगे या तिघांना ताब्यात घेतले. दरम्यान चौकशीत त्या तिघांनी साबळेवाडी व हातकणंगले येथील तीन बार फोडल्याची कबुली दिली. ही कारवाई अविनाश कुमार यांच्या मार्गदर्शनाखाली पोलिस निरीक्षक सुनील पाटील, कर्मचारी प्रशांत माने, राजू जरळी, गुरू झांबरे, सुहास पाटील, दीपक घोरपडे, युक्ती ठोंबरे, रामा माळी यांनी केली.

संशयितांचा आजार झाला बरा...

चौकशी दरम्यान संशयित अविनाश कोकाटे याने घसा दुखत आहे, छातीत दुखत आहे, कोरोनाची लक्षणे दिसतात असा बहाणा करण्यास सुरवात केली. तशी पोलिसांची तारांबळ उडाली. त्यांनी त्याला थेट तपासणीसाठी सीपीआरमधील कोरोना कक्षात नेले. डॉक्‍टरांकडून त्याची तपासणी करण्यात आली. मात्र यात कोरोना संबधी त्यांना कसलीच लक्षणे दिसून आली नाही. तसा संशयिताचा आजार बरा झाल्याने पोलिसांनी सुटकेचा निश्‍वास सोडला. त्याचवेळी दुसरा संशयित मोहित मिनेकर हा तब्येत खालावली, चक्कर येते अशी कारणे सांगू लागला. त्यानंतर त्यालाही रुग्णालयात नेले. तेथे त्याची वैद्यकीय तपासणी केली. त्यानंतर प्राप्त झालेल्या अहवालानंतर त्याचेही पितळ उघडे पडल्याचे प्रशिक्षणार्थी आयपीएस अधिकारी अविनाश कुमार यांनी सांगितले.