कोल्हापूर - शिवाजी विद्यापीठातील क्रीडा विभागाच्या कारभारावर ताशेरे ओढत क्रीडा विभागावर आज टीकेची झोड उठविण्यात आली. विभागाचे संचालक डॉ. पी. टी. गायकवाड अथवा संबंधित खेळाडू दोषी असतील तर त्यांच्यावर कारवाई करावी, अशी भूमिका घेत सदस्यांनी सभात्यागाचा पवित्रा घेतला. कुलगुरू डॉ. देवानंद शिंदे यांनी बोर्ड ऑफ स्पोर्ट्स अॅन्ड एज्युकेशन अंतर्गत सत्यशोधन समिती स्थापन करुन समितीच्या अहवालानुसार कारवाई करण्याची ग्वाही दिली. समितीत अधिसभा सदस्यांचे प्रतिनिधित्व असेल, असेही त्यांनी सांगितले. राजर्षी शाहू सभागृहात अधिसभा झाली.
दोषींना कुलगुरू पाठिशी घालतात का ? असा सूर
श्रीनिवास गायकवाड यांनी क्रीडा विभागाच्या कारभारावर आक्षेप नोंदवत सभेच्या सुरुवातीला स्थगन प्रस्ताव मांडण्याची परवानगी मागितली. कुलसचिव डॉ. विलास नांदवडेकर यांनी तो सभेपूर्वी अध्यक्षांना देण्यात आला नसल्याने नाकारला. त्यावर श्री. गायकवाड यांनी खेलो इंडिया स्पर्धेसाठी एक खेळाडू मुकला असून, खेळाडूंच्या भावना तीव्र आहेत. अनेक वेळा क्रीडा अधिकारी विभागात उपस्थित नसतात. समित्या क्रीडा नियमावलीनुसार नाहीत, असा आरोप केला. प्रा.शंकर कुलकर्णी यांनी क्रीडा विभागाचे सशक्तीकरण झालेले नसून, संचालकांना पदावरुन हटविण्याची मागणी केली. पुन्हा गायकवाड यांनी दोषींना कुलगुरू पाठिशी घालतात का ? असा सूर आहे. रुसा फंडाचे काय झाले ? क्वालिटीचे क्रीडा साहित्य आहे का ? क्रीडा धोरण राबवले आहे का ? क्रीडा विभागाच्या तक्रारींवर समिती नेमून कारवाई करावी, अशी भूमिका घेतली.
कारवाई करण्याचे आश्वासन
भैय्या माने यांनी विद्यापीठाबाबत गैरसमज निर्माण होत असून ठोस निर्णय घेण्याची वेळ आल्याचे स्पष्ट केले. प्रा.प्रताप पाटील यांनी या प्रकरणात प्रशासन गांभीर्याने लक्ष घालत नसेल तर सुधारणा कशी होणार, असा प्रश्न उपस्थित केला. कुलगुरू डॉ. शिंदे यांनी सत्यता पडताळल्याखेरीज निर्णय घेता नाही. याचा अर्थ प्रशासनाची जबाबदारी संपलेली नाही. सत्यशोधन समिती नेमून समितीच्या अहवालानुसार कारवाई करण्याची ग्वाही दिली. त्यांच्या या वक्तव्यावर गायकवाड यांचे समाधान झाले नाही. त्यांनी खेळाडूच्या विम्याचा ठराव होऊन दीड वर्षे झाली तरी कार्यवाही का झाली नाही, असा प्रश्न केला. प्रा. कुलकर्णी यांनी चर्चा रेकाॅर्डिंग करावी, अशी मागणी केली. गायकवाड यांनी सभात्यागाचा पवित्रा घेतला. प्रश्नोत्तराच्या तासात या विषयावर कारवाई करण्याचे आश्वासन दिल्यानंतर कुलगुरू डॉ. शिंदे यांनी कामकाजाचा आढावा घेतला.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.