कोल्हापूर - पंचगंगा नदीवर आज दुपारी साडेतीनच्या सुमारास मच्छिंद्र झाली. परंपरागत मच्छिंद्री झाली म्हणजे महापूर आला असे मानले जाते. सलग दोन-अडीच दिवस झालेल्या पावसामुळे आज दुपारी साडेतीनच्या सुमारास पंचगंगा नदीच्या पुलावरील कमानीजवळ माशा सारख्या असलेल्या आकारावर पाणी आले आणि कोल्हापुरात महापूर सुरू झाल्याचे स्पष्ट झाले.

कोल्हापुरात अतिवृष्टी झाली की मच्छिंद्री झाली काय ? असे विचारले जाते. कारण पंचगंगा नदीवरील राजाराम बंधाऱ्यावर साधारण 43 फूट पाणी पातळी पोहोचल्यानंतर धोका पातळी गाठल्याचे प्रशासनाकडून जाहीर करण्यात येते. ज्यावेळी मच्छिंद्री होईल, त्यावेळी कोल्हापुरात महापूर आला असे मानले जाते.

मच्छिंद्री म्हणजे काय ? व्हिडीओ पाहा...

कोल्हापूर शहरात पाणी घुसण्याची शक्यता

गेल्या 48 तासांमध्ये धरणातील पाणी नदीमध्ये न सोडता ही पंचगंगा नदीची पाणीपातळी तब्बल वीस फुटाने वाढली आहे. त्यामुळे लवकरच कोल्हापूर शहरात पाणी घुसण्याची शक्यता आहे. कोल्हापुरातील कसबा बावडा परिसरात राजाराम बंधारा आहे. या बंधाऱ्यावर नदीपात्रातील पाण्याने 39 फूट गाठले तर इशारा पातळी मानली जाते. तसेच 43 फुटावर पाणी पोहोचले तर धोका पातळी समजून शहरात पाणी येऊ शकते असे संकेत आहेत. त्यामुळे धोका पातळी झाल्यानंतर स्थलांतराचा वेग वाढविण्यात येतो.

वाचा - चंद्रकांतदादांचे दोन चेहरे, त्यांनी मुक्त चिंतन करावे

पंचगंगा नदीवरील शिवाजी पुलाजवळ कमानीला असलेल्या माशाच्या आकाराजवळ जोपर्यंत पावसाचे पाणी लागत नाही, तोपर्यंत कोल्हापूरला महापुराचा कोणताही धोका नाही, असे मानले जाते. मात्र या माशाच्या आकारावरून पाणी ओलांडू लागले तर मात्र मच्छिंद्री झाली, असे समजून महापुराचा धोका उंबरठ्यापर्यंत आल्याचे कोल्हापूरकर समजतात. त्यामुळेच कोल्हापुरात पाऊस अधिक झाला तरीही जो पर्यत मच्छिंद्री होत नाही तोपर्यंत स्थलांतर, मदत कार्याची व्याप्ती वाढत नाही. 
आज सकाळी अकराच्या सुमारास ही पातळी सव्वा फुटाने कमी होती, मात्र दुपारी साडेतीनच्या दरम्यान मच्छिंद्र झाली आणि कोल्हापुरात महापूर आल्याचे स्पष्ट झाले.

संपादन - मतीन शेख