गडहिंग्लज : भाजपतील पदाधिकारी (Gadhinglaj BJP) निवडीवरून जुन्या व नव्या कार्यकर्त्यांत तयार झालेली बेदिली खासदार धनंजय महाडिक (Dhananjay Mahadik) यांच्या यशस्वी शिष्टाईने संपुष्टात आली. नाराज कार्यकर्त्यांनाही जिल्हा व तालुका कार्यकारिणीत संधी देण्याची ग्वाही दिल्यानंतर नाराजांनी आपल्या बंडाची तलवार म्यान केली.

भाजप जिल्हाध्यक्ष राहुल देसाई यांनी केलेल्या पदाधिकारी निवडीनंतर नाराजीचे पडसाद उमटले होते. हा वाद टोकाला जाऊ नये म्हणून महाडिक यांनी येथील विश्रामगृहात बंद खोलीत नाराजांशी चर्चा केली. यावेळी जिल्हाध्यक्ष देसाई उपस्थित होते.

सुरवातीला नाराज कार्यकर्त्यांनी भावना व्यक्त केल्या. नव्या निवडींवर नाराजी व्यक्त करत त्या रद्द करून फेरनिवडी करण्याची मागणी केल्याचे समजते. दरम्यान, बैठकीनंतर महाडिक यांनी जुन्या व नव्या कार्यकर्त्यांत समेट झाल्याचे जाहीर केले.

पत्रकारांशी बोलताना ते म्हणाले, ‘सगळीकडेच वरिष्ठांच्या सूचनेनुसार पदाधिकारी निवडी झाल्या आहेत. काही ठिकाणी नाराजी आहे. ती दूर करण्याचा प्रयत्न करीत आहे. जुन्या कार्यकर्त्यांना सोबत घेऊनच काम सुरू आहे. अजूनही जिल्हा व तालुकास्तरावरील काही पदे निवडायची आहेत. तर काही ठिकाणी विस्तार करावयाचा आहे. त्यात जुन्या कार्यकर्त्यांना संधी दिली जाईल. तसेच कोणताही प्रश्न सोडविण्यासाठी आणि विकासकामे करण्यास मी कटिबद्ध असल्याचे नाराजांना शब्द दिला आहे. त्यामुळे हा वाद आता संपुष्टात आला असून जुने व नवीन कार्यकर्ते एकसंघपणे काम करतील.’

बैठकीस उपस्थित मार्तंड जरळी, मारुती राक्षे, रमेश रिंगणे, आनंद पेडणेकर, चंद्रकांत सावंत, विठ्ठल भमानगोळ आदी नाराजांनी महाडिक यांनी दिलेल्या शब्दानंतर, सक्रीय होऊन पक्षाचे काम सुरू करणार असल्याचे जाहीर केले. यावेळी प्रकाश चव्हाण, शिवाजीराव पाटील, भरमू पाटील, हेमंत कोलेकर, संदीप नाथबुवा, महादेव साखरे, संजय बटकडली, आशिष साखरे, संदीप कुरळे आदी उपस्थित होते.

लवकरच कार्यकारिणी विस्तार

दरम्यान, अनंत चतुर्थीनंतर कार्यकारिणी विस्ताराचा मुहूर्त ठरल्याची चर्चा आहे. काही समांतर पदे निर्माण करून तेथे जुन्याना संधी देणार असल्याचेही कळते. तसे झाल्यास काम करताना आणखीन अडचणी वाढण्याचीच शक्यता आहे. किंबहुना नाराजी नाट्यावर आज पडदा टाकला असला तरी भविष्यात एकमेकांची मने जुळणार का? हा प्रश्न कायम आहे.