नृसिंहवाडी (कोल्हापूर) : पन्नास रुपयांची बनावट नोटा खपवणाऱ्या मायलेकास ग्रामस्थांनी काल सायंकाळी पाचच्या सुमारास पकडले. याबाबत रात्री उशिरापर्यंत शिरोळ पोलिस ठाण्यात गुन्हा नोंद करण्याची प्रक्रिया सुरू होती. 

या बाबत पोलिस आणि स्थानिक व्यापाऱ्यांकडून मिळालेली माहिती अशी : बाजारपेठ परिसरात कोल्हापूर परिसरातील मायलेक दत्त दर्शनासाठी आले होते. दर्शनानंतर या दोघांनी 
बाजारपेठेतील दुकानामध्ये पन्नास रुपयांची नोट देऊन खरेदी करण्यास सुरुवात केली. अशा प्रकारे पाच ते सहावेळा खरेदी घडली. त्याचा दुकानदारांना संशय आला. यावेळी पन्नास रुपयांची नोट बघितल्यावर ती नोट बनावट असल्याचा संशय आला.

हेही वाचा - गांधीनगर बाजारपेठेत चोरट्यांची धास्ती
 

दुकानदारांनी त्यांच्याकडे चौकशी केल्यावर उडवाउडवीची उत्तरे मिळाली. दुकानदारांनी एकत्रित येऊन या मायलेकांना शिरोळ पोलिसांच्या ताब्यात दिले. याबाबत रात्री उशिरापर्यंत शिरोळ पोलिस ठाण्यात गुन्हा दाखल करण्याचे काम सुरू होते. दरम्यान, पोलिसांनी कारवाईमध्ये दिरंगाई न करता बनावट नोटा चलनात आणणाऱ्या टोळीवर कारवाई करावी, अशी मागणी व्यापारी करीत आहेत.

"त्या दोघांकडून जप्त केलेल्या नोटा बनावट आहेत. तपासणी मशिनच्या साह्याने या नोटा तपासण्यात येत आहेत. त्यानंतर रात्री उशिरा त्यांच्यावर गुन्हा दाखल करण्यात येणार आहे."

- शिवानंद कुंभार, सहायक पोलिस निरीक्षक, शिरोळ ठाणे

हेही वाचा -  प्रवेश प्रक्रिया तत्काळ थांबवावी ; सकल मराठा समाजाची मागणी
 

संपादन - स्नेहल कदम