जोतिबा डोंगर (कोल्हापूर) : 'श्री क्षेत्र जोतिबा डोंगर' येथे जिल्हा प्रशासनाने सुरू केलेली ई-पास दर्शन व्यवस्था बंद करून परंपरेने सुरू असणारी दर्शन व्यवस्था सुरू करावी अशी मागणी येथील ग्रामस्थ, पुजारी, हक्कदार पुजारी, उत्कर्ष समितीच्या वतीने पालकमंत्री सतेज पाटील यांच्याकडे निवेदनाद्वारे केली आहे. पालकमंत्री सतेज पाटील यांनी यासंदर्भात जिल्हाधिकारी यांची भेट घेऊन चर्चा करण्याचे आश्‍वासन ग्रामस्थ आणि पुजाऱ्यांना दिले आहे.

जोतिबा डोंगर येथे नवरात्रौत्सवापासून जिल्हा प्रशासनाने भाविकांसाठी ई-पास दर्शन व्यवस्था सुरु केली आहे. यामुळे अनेक भाविकांना त्रास होत आहे. या सुविधेमुळे अनेक भाविक गोंधळूनही जातात. वयोवृद्ध भाविकांना केवळ कळस दर्शन घेऊन परतावे लागत आहे. दरम्यान ई-पास अजून पंधरा दिवस सुरू ठेवणार असल्याचे देवस्थान समितीने नुकतेच जाहीर केले आहे. परंतू या व्यवस्थेला येथील ग्रामस्थ, पुजारी व गुरव समाजाचा विरोध आहे.

ई-पास दर्शन नियोजनामुळे जोतिबा डोंगर येथे अवलंबून असणाऱ्या अर्थिकतेला बाधा निर्माण होत आहे. त्यामुळे ई-पास दर्शन व्यवस्था कायमस्वरूपी बंद करून परंपरागत सुरू असलेली दर्शन रांग सुरू करावी अशी मागणी केली आहे. यावेळी पालकमंत्री पाटील यांनी याबाबत सोमवारी जिल्हाधिकारी यांच्याबरोबर चर्चा करून मार्ग काढू असे आश्वासन दिले आहे. यावेळी सरपंच राधा बुणे, कृष्णात बुणे मच्छिंद्र बुणे, हक्कदार समितीचे अध्यक्ष नवनाथ लादे आदी उपस्थित होते.