बेळगाव : शाळा वेळेत सुरू न झाल्याचा फटका २०२१-२२ च्या शैक्षणिक वर्षाला बसणार आहे. पुढील वर्षी दोन महिने विलंबाने म्हणजे जुलै किंवा ऑगस्टदरम्यान शैक्षणिक वर्ष सुरू होण्याची शक्‍यता आहे. दरम्यान, शैक्षणिक वर्षात सुट्यांचे प्रमाण कमी करून अभ्यासक्रम पूर्ण करण्याबाबत शिक्षण खाते विचार करीत आहे.

कोरोनामुळे यंदा मार्चपासून बंद झालेल्या शाळा अद्यापही सुरू करता आलेल्या नाहीत. त्यामुळे शैक्षणिक वर्षात विद्यार्थ्यांचे शैक्षणिक नुकसान झाले आहे. दहावी व बारावीचे वर्ग जानेवारीत सुरु करण्याबाबत चर्चा सुरु आहे. दहावीचे वर्ग सुरू झाल्यावर येणाऱ्या काळात कशी परिस्थिती निर्माण होणार आहे, यावर शाळांचे भवितव्य अवलंबून राहणार आहे. तसेच गेल्यावर्षीप्रमाणे विनापरीक्षा उत्तीर्ण न करता यावेळी काही महिने शाळा भरवून परीक्षा घ्यावी, असे मत व्यक्‍त होत आहे.

हेही वाचा -  शिवसेनेने मारली बाजी ; राष्ट्रवादीचाही धडाका, महाआघाडीत एकी नसल्याचे चित्र -

जानेवारी महिन्यात शाळा सुरु झाल्या तरी दहावी व बारावीच्या परीक्षेला अधिक विलंब होणार आहे. त्यामुळे कोरोनाचे संकट जाऊन परिस्थिती पूर्वपदावर आली तरी मेअखेर शैक्षणिक वर्षाला सुरुवात होण्याची शक्‍यता नाही, याची जाणीव शिक्षण खात्याला आहे. त्यामुळेच २०२०-२१ चे शैक्षणिक वर्ष अद्याप पूर्ण झालेले नसतानाच पुढील शैक्षणिक वर्ष सुरु होण्यास विलंब होईल, असे मत शिक्षणाधिकाऱ्यांतून व्यक्‍त होत आहे. महाविद्यालये सुरु करण्याचा निर्णय घेण्यात आला असला तरी विद्यार्थ्यांना कोरोना चाचणी करण्याची सूचना करण्यात आली होती. त्यामुळे पुढील महिन्यात नववी ते बारावीचे वर्ग भरवतानाही अधिक काळजी घ्यावी लागणार आहे. 

"दहावी परीक्षेला विलंब झाल्यास पुढील शैक्षणिक वर्षही विलंबाने सुरू होण्याची शक्‍यता आहे. मात्र, सध्या शिक्षण खात्याने यंदाच्या शैक्षणिक वर्षावर लक्ष केंद्रीत केले. जानेवारीत नववी ते बारावीचे वर्ग सुरू करण्याचा निर्णय लवरकच घेतला जाणार आहे."

- ए. बी. पुंडलिक, जिल्हा शिक्षणाधिकारी

हेही वाचा - पक्ष राहीले बाजूलाच अन्  कार्यकर्तेच भिडले - ​

संपादन - स्नेहल कदम