गडहिंग्लज : येथील भाजीमंडईत गेल्या महिनाभरापासून टोमॅटो, वांग्याची आवक मोठ्या प्रमाणात वाढली आहे. मागणीपेक्षा आवक जास्त झाल्याने घाऊक बाजारात दर गडगडले आहेत. टोमॅटोला पाच, तर वांग्याला केवळ 10 रुपये किलोला भाव आहे. सध्या मिळणारा दर नेहमीच्या तुलनेत निम्याहून कमी आहे. त्यामुळे या दरात काढणी, वाहतूक खर्चही भागेना झाला आहे. बियाणे, औषधे, मजुरी यासाठी केलेली गुंतवणूक तरी किमान मिळावी यासाठी नाईलाजाने शेतकरी उत्पादने बाजारात आणत आहेत. परिणामी, टोमॅटो, वांगी उत्पादक अडचणीत आला आहे. 

येथील भाजीमंडई पुर्वी लगतच्या सीमाभागातून येणाऱ्याया भाजीपाल्यावरच अंवलबुन होती. मात्र, गेल्या दोन दशकात या परिसरात झालेल्या पाटबंधारे प्रकल्पामुळे भाजीपाला उत्पादनाकडे कल वाढला. मुख्यतः रोज मिळणारा ताज्या पैशामुळे भाजीपाला उत्पादकांची संख्या झपाट्याने वाढली आहे. हिरण्यकेशी नदीकाठच्या गावात भाजीपाला घेणारे शेतकरी आहेत. स्थानिक गरज भागवून येथुन रोज कोकण, गोवा याठिकाणी भाजीपाला पाठविला जातो. रोज सकाळी बाजार समितीच्या आवारात सौदे होतात. 

वांगी हे दोन महिन्याने येणारे पिक आहे. विशिष्ट चवीमुळे पांढऱ्या वांग्याना मागणी अधिक आहे. साहजिकच या जातीच्या वांग्याचे रोपांचे दर तेजीत असतात. वांगी आणि टोमॅटोच्या एका रोपाची किंमत सरासरी एक रुपये आहे. दीड महिन्यापुर्वी 200 ते 300 रुपये असणाऱ्या वांग्याचा दर आवक वाढल्याने 100 रूपयावर घसरला. त्यात हुमणी, पांढरी माशी या रोगांनी उत्पादनांवर परिणाम झाला आहे तो वेगळा. टोमॅटोला फळधारणा दीड ते दोन महिन्याने होते. सरासरी किमान आठ रुपये दर मिळाला तरच उत्पादकाच्या घामाला दाम मिळतो. पंरतु, सध्या मिळणाऱ्या दरात ओढाताण करण्याची वेळ आली आहे. 

तग धरून आहे
या हंगामात टोमॅटोचा दराने निचांक गाठला. दरातील चढउतार असले तरी शेतकऱ्यांनी उत्पादनात सातत्य ठेवायला हवे. शेतीतील सर्वच कामे कुटूंबातील सदस्य करत असल्याने दर कमी होऊनही तग धरुन आहे. 
- प्रशांत कोरी, टोमॅटो उत्पादक, औरनाळ 

भुर्दंड सोसण्याची वेळ
बियाणे, औषधे, काढणी, वाहतूक यांचा मेळ घातला तर वांग्याला किमान किलोला 15 ते 20 रुपये दर मिळायला हवा. प्रत्यक्षात 10 रुपये दर मिळत असल्याने भुर्दंड सोसण्याची वेळ आली आहे. 
- सुभाष जाधव, वांगी उत्पादक, मुगळी 

संपादन - सचिन चराटी

kolhapur