चंदगड - बेळगुंदी (जि. बेळगाव ) येथे कोरोनाबाधीत रुग्ण आढळल्याने कर्नाटक सीमेवरील चंदगड तालुक्यातील अकरा गावे आजपासून सील करण्यात आली. तहसीलदार विनोद रणावरे यांनी आपत्ती व्यवस्थापन तसेच साथरोग नियंत्रण अधिनियमानुसार हा आदेश लागू केला. त्यानुसार या गावांतील प्रत्येक कुटुंबाची चौकशी, संशयितांना कोरंटाईन करणे आदी कारवाई सुरू झाली आहे.

तालुक्यातील शिनोळी खुर्द, शिनोळी बुद्रुक, कोलिक, मळवीवाडी, हजगोळी, सरोळी, ढेकोळी, ढेकोळीवाडी, सुरुते, खालसा म्हाळुंगे आदी गावे बेळगाव शहराच्या सीमेवर आहेत. कर्नाटक सीमेवरील गावे सुद्धा मराठी भाषिक असून नातेसंबंध मोठ्या प्रमाणात आहेत. बेळगाव ही या सर्वच गावांसाठी जवळची आणि मोठी बाजारपेठ आहे. त्यामुळे दैनंदिन कामकाजासाठी या गावातील लोक बेळगावला ये-जा करीत असतात. बेळगुंदी हे गाव या गावांना लागूनच आहे. त्यामुळे तेथील कोरोना बाधितांच्या संपर्कातून प्रादुर्भाव वाढू शकतो. त्यासाठी खबरदारी म्हणून आज ही सर्व गावे सील करण्यात आली. या गावातील कोणीही नागरिक गावातून बाहेर पडू शकणार नाही, शिवाय अन्य गावातील नागरिक या गावात प्रवेश करू शकणार नाहीत याचे नियोजन केले आहे.

ग्रेटच : सेवानिवृत्ती मिळाली, तरीही तो म्हणतोय विनामूल्य काम करण्याची संधी द्या... 

दक्षता समिती कडून या गावातील जे नागरिक गेल्या पंधरा दिवसात बेळगुंदीला गेले होते, ते कोणाला भेटले होते, त्यांचे नाव व मोबाईल क्रमांक संकलित केले जात आहेत. जे नागरिक रुग्णाच्या संपर्कात आले असतील त्यांनी तत्काळ आरोग्य केंद्रात जाऊन तपासणी करून घेणे व कोरंटाईन होण्यास सांगितले जात आहे. संबंधितांना तुर्केवाडी येथील कोरंटाईन केंद्रात दाखल करण्याबाबत तहसीलदारांनी सूचित केले आहे. या प्रत्येक गावातून दक्षता समितीकडून तपासणी पूर्ण झाल्यावर कोरोनाबाधिताच्या संपर्कात आलेल्या व्यक्तींचा विचार करून या गावातील संचारबंदी किती दिवस ठेवायची हे निश्चित केले जाणार आहे.