गडहिंग्लज : गडहिंग्लज व आजरा तालुक्‍यात सुरू असलेल्या नेत्रदान चळवळीने "साठी' गाठली. येथील शैला शंकरराव हत्तरकी यांचे आज मरणोत्तर नेत्रदान झाले. चळवळीतील हे 60 वे नेत्रदान ठरले. ग्रामीण भागात सुरू झालेली ही चळवळ आता शहरातही रुजत आहे. गडहिंग्लज शहरातील गेल्या दोन महिन्यातील दुसरे, तर एकूण चौथे नेत्रदान ठरले. 

गडहिंग्लज तालुक्‍यातील अत्याळ, बेळगुंदी, करंबळी, कौलगे, ऐनापूर, भडगाव या गावासह आजरा तालुक्‍यातील सरोळी गावात नेत्रदान चळवळीचे प्रत्यक्ष काम सुरू आहे. प्रबोधनाच्या पातळीवर चांगले काम झाल्यामुळे चळवळ रुजली आहे. या गावातून 49 जणांचे मरणोत्तर नेत्रदान झाले आहे. याशिवाय गडहिंग्लज शहरासह नूल, लिंगनूर कसबा नूल, शिप्पूर तर्फ आजरा, उत्तूर (ता. आजरा), बामणे (ता. भुदरगड) या गावातील 10 जणांचे नेत्रदान झाले. 

ग्रामीण भागातून सुरवात झालेली ही चळवळ गडहिंग्लज शहरातही रूजत आहे. यापूर्वी तीन जणांचे मरणोत्तर नेत्रदान झाले होते. दरम्यान, येथील डॉक्‍टर्स कॉलनीतील शैला हत्तरकी यांचे आज सकाळी हृदयविकाराच्या धक्‍क्‍याने निधन झाले. तालुक्‍यात सुरु असलेल्या चळवळीची माहिती असल्याने त्यांच्या नातेवाईकांनी मरणोत्तर नेत्रदान करण्याचा निर्णय घेतला. त्यानंतर अंकूर आय हॉस्पिटलच्या डॉक्‍टरांच्या पथकाने हत्तरकी यांच्या घरी जाऊन नेत्रदानाची प्रक्रिया पार पाडली. शैला हत्तरकी यांच्या मागे मुलगा, दोन मुली, सून, नातवंडे असा परिवार आहे. येथील झील एंटरप्रायझेसचे सुनील हत्तरकी यांच्या त्या आई होत.