म्हाकवे : बानगे (ता. कागल) येथील शेतकरी शहाजी गणपती पाटील यांनी प्रधानमंत्री पीक विमा योजनेत सहभाग नोंदवला होता. त्यांनी विमा रक्कमही भरली होती. पण कृषी कार्यालय व विमा कंपनी, बॅंक प्रतिनिधीच्या अनागोंदी कारभारामुळे त्यांना या विमा योजनेचा लाभ मिळाला नाही. शेतकरी पाटील हे याबाबात कागल तहसीलदार, कृषी कार्यालय व बॅंकेकडे हेलपाटे मारुन थकले पण त्यांना न्याय मिळाला नाही. 

हे पण वाचा -  जयंत पाटील यांनी केली शाळांबाबत मोठी घोषणा 
 

अल्पभूधारक असलेल्या शहाजी गणपती पाटील यांनी सन 2019-20 साठी प्रधानमंत्री पीक विमा योजनेचा प्रस्ताव दिला होता. पीक विम्याची मुदत 31 जुलै असताना त्यांनी 18 जुलै रोजी पीक विम्याचे चलन बॅंक ऑफ महाराष्ट्र शाखा म्हाकवेमध्ये भरले होते. ऑगस्टमध्ये आलेल्या पुरात त्यांचे संपूर्ण पीक बुडाले. पुरात बुडालेल्या या पिकाचा कृषी सहाय्यक रियाज पखाले यांनी पंचनामा केला. परंतु अधिकारी, कर्मचाऱ्यांच्या चुकीमुळे या शेतकऱ्याला पीक विम्याचे पैसे भरूनही नुकसान भरपाई मिळालेली नाही. 

हे पण वाचा - शेतकऱ्यांनो खुशखबर तुमच्यासाठी आलंय नविन कॅलेंडर..

कृषी खात्याच्या कर्मचाऱ्यांच्याकडून हलगर्जीपणा होत आहे. बॅंकेनेही पिक विम्याच्या हप्त्याची रक्कम शेतकऱ्यांच्या खात्यावर जमा केली आहे. अधिकाऱ्याच्या चूकीमुळे पिकविम्याची नोंदणीच झालेली नाही. त्याचा फटका या शेतकऱ्याला बसला आहे. 
बानगे (ता.कागल) येथील अल्पभूधारक शेतकरी शहाजी गणपती पाटील यांची दोन्ही मुले अंध तर पत्नीला दुर्धर आजार आहे. मुलांचा व पत्नीचा दवाखान्याचा खर्च करताना ते मेटाकुटीस आले आहेत. शेतीतून मिळणाऱ्या उत्पन्नावरच त्यांचा संसाराचा गाडा सुरू आहे. अशातच महापुराने संपूर्ण पिकच गेले. नुकसान भरपाई अधिकाऱ्यांच्या चुकीमुळे मिळत नाही. अधिकाऱ्यांनी आता माणुसकीच्या भावनेतून त्यांना मदत करण्याची गरज आहे. 

" मी पिक विम्यासाठी रितसर अर्ज व विमा रक्कम चलनाने भरली होती. महापुराने पीक गेल्यानंतर कृषी सहाय्यक रियाज पखाले यांनी शेतीमध्ये हजर राहून पंचनामा केला. परंतु विविध कारणे दाखवून मला प्रधानमंत्री पीक विमा योजनेचा लाभ अद्यापही दिलेला नाही" 
- शहाजी पाटील. शेतकरी, बानगे (ता.कागल) 

 
"शहाजी पाटील यांच्या प्रकरणाची चौकशी करून या शेतकऱ्यावर अन्याय झाला असल्यास या शेतकऱ्याला न्याय मिळवून देण्याचा प्रामाणिक प्रयत्न करू.'' 
- अनिकेत माने, तालुका कृषी अधिकारी कागल.