जयसिंगपूर : केंद्र व राज्य सरकारकडून एकरकमी एफआरपीची रक्कम तीन टप्प्यात देण्याचा घाट घातला आहे. याविरोधात जो राजकारणी एकरकमी एफआरपीबाबत यशस्वी लढा देईल त्याला स्वतःची एक एकर बागायती जमीन बक्षीस देण्याची घोषणा नांदणी (ता. शिरोळ) येथील रामगोंडा पाटील या शेतकऱ्याने केली आहे.

पाटील हे नांदणी (ता. शिरोळ) येथील प्रगतशील शेतकरी आणि स्वाभिमानी शेतकरी संघटनेचे कार्यकर्ते आहेत. स्वाभिमानी शेतकरी संघटनेचे खासदार राजू शेट्टी हेच काही वर्षापासून रस्त्यावरची लढाई करत आहेत. पण राज्यकर्त्यांकडून भ्रमनिरास होत असल्याने अखेर पाटील यांनी इतर राज्यकर्त्यांना सोशल मीडियाच्या माध्यमातून हे आव्हान दिले आहे. त्यांची अठरा एकर बागायती जमीन आहे. त्यांच्याकडे उस, फ्लॉवरची शेती असते. ते गावातील तंटामुक्त समितीचे अध्यक्ष राहिले आहेत.

काही दिवसांपासून एकरकमी एफआरपी देण्याबाबतची चर्चा ऊसपट्ट्यात सुरू आहेत. याविरोधात आंदोलनाची वज्रमूठ बांधण्याचे काम शेतकरी संघटनांकडून होत आहे. पण या धोरणाविरोधात कोणताही राजकारणी व्यक्ती बोलायला अथवा आंदोलन करण्यासाठी तयार नाही. यामुळे ऊस उत्पादकात प्रचंड नाराजी आहे. ऊस उत्पादकांच्या हक्काच्या दराला कात्री लागत असल्याने अर्थकारण कोलमडण्याची दाट शक्यता आहे. ही बाब कोणीच गांभीर्याने घेत नसल्याने पाटील यांनी उद्विग्नतेतून सोशल मीडियाच्या माध्यमातून ही घोषणा केली आहे.

घोषणेनंतर त्यांच्याशी संपर्क साधला असता त्यांनी याला दुजोरा दिला. शेट्टी यांच्या व्यतिरिक्त कोणीही नेता याप्रश्नी रस्त्यावर उतरायला तयार नाही. धोरणकर्त्यांमध्ये कोणी वाली आहे की नाही? हाच प्रश्‍न आम्हाला निर्माण झाला आहे. त्यामुळेच विचारपूर्वक मी ही घोषणा केली असल्याचे पाटील यांनी सांगितले.