रायबाग : खोदाई केलेल्या कूपनलिकेला पाणी न लागल्याने शेतकऱ्याने त्याच ५०० फूट कूपनलिकेत उडी घेतली आहे. ही घटना आज (ता. ११) रायबाग तालुक्यातील सुलतानपूर येथे घडली. लकाप्पा दोडमनी असे उडी घेतलेल्या शेतकऱ्याचे नाव आहे. 'रेस्क्यू टीम'कडून त्याला बाहेर काढण्यासाठी प्रयत्न सुरू आहेत.

जिल्हाधिकारी डॉ. एस. बी. बोमनहळ्ळी, जिल्हा पोलिस प्रमुख लक्ष्मण निंबर्गी, तहसीलदार चंद्रकांत बजंत्री व अधिकारी सध्या घटनास्थळी आहेत. 
या बाबत अधिक माहिती अशी, लकाप्पा दोडमनी यांची पाऊण एकर जमीन आहे. या जमिनीला पाणीपुरवठा करण्यासाठी कर्ज काढून गेल्या गुरुवारी (ता. ७) पाचशे फूट खोल कूपनलिका खोदली आहे. मात्र तिला पाणी न लागल्याने चिंतेत असणाऱ्या लकाप्पा यांनी आज सकाळी दहा वाजता अंगावरील कपडे काढून थेट कूपनलिकेत उडी घेतली. ही माहिती ग्रामस्थांना समजताच एकच गर्दी झाली. रायबागचे तहसीलदार चंद्रकांत बजंत्री, तालुका पंचायत कार्यकारी अधिकारी प्रकाश वड्डर, अथणीचे पोलिस उपाधीक्षक एस. व्ही. गिरीश, मंडल पोलिस निरीक्षक के. एस. हट्टी, हारुगेरीचे पोलिस उपनिरीक्षक यमनाप्पा मांग यांनी तात्काळ घटनास्थळी भेट दिली. त्यांनी अग्निशामक दलासह  एसडीआरएफ टीमला पाचारण केले. तीन जेसीबीद्वारे कूपनलिकेच्या बाजूने खोदाई करण्यात येत आहे.

हे पण वाचा - या सात पर्यायांचा विचार केल्यास सुरू होऊ शकतात शाळा
 

घटनेची माहिती मिळताच जिल्हाधिकारी डॉ. एस. बी. बोमनहळ्ळी, जिल्हा पोलिस प्रमुख लक्ष्मण निंबर्गी सध्या पोहोचले आहेत. ते रेस्क्यू टीमसह अधिकाऱ्यांना सूचना करत आहेत. लकाप्पा हे कूपनलिकेत खालीपर्यंत गेलेले नाहीत. ते मध्यावर अडकले आहेत. त्यांच्यापर्यंत पोहोचून तात्काळ बाहेर काढण्यासाठी प्रयत्न सुरू आहेत. काही वेळाने त्यांच्यापर्यंत पोहोचल्यावर पुढील नेमकी परिस्थिती समोर येणार आहे.
 

हे पण वाचा - सावधान - परवानगीशिवाय रेल्वे  रुळ ओलांडाल तर होईल ही शिक्षा....