कोडोली : येथील वीज बिलविरोधी कृती समिनीने महावितरण कार्यालयासमोर लाक्षणिक उपोषण केले. आमदार डॉ. विनय कोरे यांनी भेट दिली असता त्यांना वीज बिल माफ करण्याचे निवेदन दिले. तसेच उपअभियंता माने यांनी निवेदन स्वीकारत वीज बिल हप्त्याने स्वीकारणार व कोणावरही अन्याय होणार नसल्याचे आश्वासन दिल्यानंतर उपोषण मागे घेतले.

कोरोना काळामध्ये भरमसाट बिले आली आहेत. आघाडी सरकारने कोरोना काळातील बिले माफ करण्याचे जनतेला वचन दिले होते; परंतु अर्थसंकल्पीय अधिवेशन संपताच ऊर्जामंत्र्यांनी बिल वसुलीचे आदेश दिले. याच्याविरोधात कोडोली वीज बिलविरोधी कृती समितीतर्फे जिल्हा परिषद सदस्य विशांत महापूरे, अशोक गायकवाड, दीपक सकटे, विकास चोपडे, नरेंद्र पाटील, अरुण महापूरे, अनिल महापूरे, दीपक चौगुले यांनी लाक्षणिक उपोषण केले होते.

जिल्हा परिषद सदस्य शिवाजीराव मोरे, सरपंच मनीषा पाटील, उपसरपंच निखील पाटील, मानसिंग पाटील, शेतकरी संघटनेचे युवा नेते सौरभ शेट्टी, पन्हाळा सभापती रणजित शिंदे, कोडोली शिक्षण संघाचे अध्यक्ष अशोक पाटील, किरण पाटील, जनसुराज्याचे प्रवक्ते व सरचिटणीस ऍड. राजेंद्र पाटील यांच्यासह शेतकरी संघटना, व्यापारी संघटना, कोडोली परिसर दळप-कांडप संघटना, शेतकरी कामगार पक्ष, दलित महासंघ अशा विविध संघटनांनी उपोषणास पाठिंबा दर्शविला. यावेळी कोडोली पोलिसांनी बंदोबस्त ठेवला होता.

संपादन ः रंगराव हिर्डेकर