जयसिंगपूर (कोल्हापूर) - केवळ दीडशे रुपयांसाठी एकाच्या डोक्‍यात लाकडी ठोकळा घालून जखमी केल्याची घटना शहरात घडली. सुभाषकुमार प्रल्हाद भलाई (वय 32, जयसिंगपूर, मूळ गांव बाजोर, जि. सीकर राजस्थान) हा गंभीर झाला. घटनेनंतर संशयित आरोपी मुकेश वर्मा (भासावा राजस्थान) पसार झाला. घटनेची नोंद जयसिंगपूर पोलिसांत झाली आहे. 

महेशकुमार रामलाल वर्मा यांनी फिर्याद दिली आहे. फिर्यादी महेशकुमार वर्मा यांच्याकडे संशयित मुकेश वर्मा आणि जखमी सुभाषकुमार भलाई कामगार आहेत. त्यांचे काम सध्या जयसिंगपूर व आरग (ता. मिरज) येथे सुरू आहे. कॉन्ट्रक्‍टरने 22 ऑगस्टला सुभाषकुमार भलाई यांच्याकडे पाचशे रुपये दिले. भलाई याने त्यातील शंभर रुपये मुकेश वर्मा याला दिले. या वेळी मुकेश वर्मा याने भलाई यांच्याकडे आणखी दीडशे रुपयांची मागणी केली. पैशांच्या देवाण-घेवाणीतून झालेल्या वादातून संशयित आरोपी वर्मा याने सुभाषकुमार याला जिवे मारण्याच्या उद्देशाने डोक्‍यात लाकडी ठोकळा घालून जखमी करून त्यांना त्याच अवस्थेत सोडून फरारी झाला. 

हे पण वाचा - धक्कादायक ; उघड्यावर सुरू होता मटका, कारवाईसाठी गेलेल्या पोलिसांवरच केली दगडफेक

फिर्यादी महेशकुमार वर्मा यांनी जखमीला मिरज येथील मिशन रुग्णालयात दाखल केले आहे. जयसिंगपूर पोलिस संशयिताचा शोध घेत आहेत. अधिक तपास जयसिंगपूर पोलिस करीत आहेत.

हे पण वाचा - विद्यार्थ्यांच्या घामाच्या धारांनी भरला बंधारा ; गावकाऱ्यांनी ठोकला सलाम

संपादन - धनाजी सुर्वे